vul@1Samuel:4:1 @ egressus est namque Israhel obviam Philisthim in proelium et castrametatus est iuxta lapidem Adiutorii porro Philisthim venerunt in Afec
vul@1Samuel:4:2 @ et instruxerunt aciem contra Israhel inito autem certamine terga vertit Israhel Philistheis et caesa sunt in illo certamine passim per agros quasi quattuor milia virorum
vul@1Samuel:4:3 @ et reversus est populus ad castra dixeruntque maiores natu de Israhel quare percussit nos Dominus hodie coram Philisthim adferamus ad nos de Silo arcam foederis Domini et veniat in medium nostri ut salvet nos de manu inimicorum nostrorum
vul@1Samuel:4:4 @ misit ergo populus in Silo et tulerunt inde arcam foederis Domini exercituum sedentis super cherubin erantque duo filii Heli cum arca foederis Domini Ofni et Finees
vul@1Samuel:4:5 @ cumque venisset arca foederis Domini in castra vociferatus est omnis Israhel clamore grandi et personuit terra
vul@1Samuel:4:6 @ et audierunt Philisthim vocem clamoris dixeruntque quaenam haec est vox clamoris magni in castris Hebraeorum et cognoverunt quod arca Domini venisset in castra
vul@1Samuel:4:7 @ timueruntque Philisthim dicentes venit Deus in castra et ingemuerunt
vul@1Samuel:4:8 @ vae nobis non enim fuit tanta exultatio heri et nudius tertius vae nobis quis nos servabit de manu deorum sublimium istorum hii sunt dii qui percusserunt Aegyptum omni plaga in deserto
vul@1Samuel:4:9 @ confortamini et estote viri Philisthim ne serviatis Hebraeis sicut illi servierunt vobis confortamini et bellate
vul@1Samuel:4:10 @ pugnaverunt ergo Philisthim et caesus est Israhel et fugit unusquisque in tabernaculum suum et facta est plaga magna nimis et ceciderunt de Israhel triginta milia peditum
vul@1Samuel:4:11 @ et arca Dei capta est duoque filii Heli mortui sunt Ofni et Finees