Deuteronomy 10
vul@Deuteronomy:10:1 @ in tempore illo dixit Dominus ad me dola tibi duas tabulas lapideas sicut priores fuerunt et ascende ad me in montem faciesque arcam ligneam
vul@Deuteronomy:10:2 @ et scribam in tabulis verba quae fuerunt in his quas ante confregisti ponesque eas in arca
vul@Deuteronomy:10:3 @ feci igitur arcam de lignis setthim cumque dolassem duas tabulas lapideas instar priorum ascendi in montem habens eas in manibus
vul@Deuteronomy:10:4 @ scripsitque in tabulis iuxta id quod prius scripserat verba decem quae locutus est Dominus ad vos in monte de medio ignis quando populus congregatus est et dedit eas mihi
vul@Deuteronomy:10:5 @ reversusque de monte descendi et posui tabulas in arcam quam feceram quae hucusque ibi sunt sicut mihi praecepit Dominus
vul@Deuteronomy:10:6 @ filii autem Israhel castra moverunt ex Beroth filiorum Iacan in Musera ubi Aaron mortuus ac sepultus est pro quo sacerdotio functus est filius eius Eleazar
vul@Deuteronomy:10:7 @ inde venerunt in Gadgad de quo loco profecti castrametati sunt in Ietabatha in terra aquarum atque torrentium
vul@Deuteronomy:10:8 @ eo tempore separavit tribum Levi ut portaret arcam foederis Domini et staret coram eo in ministerio ac benediceret in nomine illius usque in praesentem diem
vul@Deuteronomy:10:9 @ quam ob rem non habuit Levi partem neque possessionem cum fratribus suis quia ipse Dominus possessio eius est sicut promisit ei Dominus Deus tuus
vul@Deuteronomy:10:10 @ ego autem steti in monte sicut prius quadraginta diebus ac noctibus exaudivitque me Dominus etiam hac vice et te perdere noluit
vul@Deuteronomy:10:11 @ dixitque mihi vade et praecede populum ut ingrediatur et possideat terram quam iuravi patribus eorum ut traderem eis
vul@Deuteronomy:10:12 @ et nunc Israhel quid Dominus Deus tuus petit a te nisi ut timeas Dominum Deum tuum et ambules in viis eius et diligas eum ac servias Domino Deo tuo in toto corde tuo et in tota anima tua
vul@Deuteronomy:10:13 @ custodiasque mandata Domini et caerimonias eius quas ego hodie praecipio ut bene sit tibi
vul@Deuteronomy:10:14 @ en Domini Dei tui caelum est et caelum caeli terra et omnia quae in ea sunt
vul@Deuteronomy:10:15 @ et tamen patribus tuis conglutinatus est Dominus et amavit eos elegitque semen eorum post eos id est vos de cunctis gentibus sicut hodie conprobatur
vul@Deuteronomy:10:16 @ circumcidite igitur praeputium cordis vestri et cervicem vestram ne induretis amplius
vul@Deuteronomy:10:17 @ quia Dominus Deus vester ipse est Deus deorum et Dominus dominantium Deus magnus et potens et terribilis qui personam non accipit nec munera
vul@Deuteronomy:10:18 @ facit iudicium pupillo et viduae amat peregrinum et dat ei victum atque vestitum
vul@Deuteronomy:10:19 @ et vos ergo amate peregrinos quia et ipsi fuistis advenae in terra Aegypti
vul@Deuteronomy:10:20 @ Dominum Deum tuum timebis et ei servies ipsi adherebis iurabisque in nomine illius
vul@Deuteronomy:10:21 @ ipse est laus tua et Deus tuus qui fecit tibi haec magnalia et terribilia quae viderunt oculi tui
vul@Deuteronomy:10:22 @ in septuaginta animabus descenderunt patres tui in Aegyptum et ecce nunc multiplicavit te Dominus Deus tuus sicut astra caeli