vul - 6

vul@Deuteronomy:6:1 @ haec sunt praecepta et caerimoniae atque iudicia quae mandavit Dominus Deus vester ut docerem vos et faciatis ea in terra ad quam transgredimini possidendam

vul@Deuteronomy:6:2 @ ut timeas Dominum Deum tuum et custodias omnia mandata et praecepta eius quae ego praecipio tibi et filiis ac nepotibus tuis cunctis diebus vitae tuae ut prolongentur dies tui

vul@Deuteronomy:6:3 @ audi Israhel et observa ut facias et bene sit tibi et multipliceris amplius sicut pollicitus est Dominus Deus patrum tuorum tibi terram lacte et melle manantem

vul@Deuteronomy:6:4 @ audi Israhel Dominus Deus noster Dominus unus est

vul@Deuteronomy:6:5 @ diliges Dominum Deum tuum ex toto corde tuo et ex tota anima tua et ex tota fortitudine tua

vul@Deuteronomy:6:6 @ eruntque verba haec quae ego praecipio tibi hodie in corde tuo

vul@Deuteronomy:6:7 @ et narrabis ea filiis tuis et meditaberis sedens in domo tua et ambulans in itinere dormiens atque consurgens

vul@Deuteronomy:6:8 @ et ligabis ea quasi signum in manu tua eruntque et movebuntur inter oculos tuos

vul@Deuteronomy:6:9 @ scribesque ea in limine et ostiis domus tuae

vul@Deuteronomy:6:10 @ cumque introduxerit te Dominus Deus tuus in terram pro qua iuravit patribus tuis Abraham Isaac et Iacob et dederit tibi civitates magnas et optimas quas non aedificasti

vul@Deuteronomy:6:11 @ domos plenas cunctarum opum quas non extruxisti cisternas quas non fodisti vineta et oliveta quae non plantasti

vul@Deuteronomy:6:12 @ et comederis et saturatus fueris

vul@Deuteronomy:6:13 @ cave diligenter ne obliviscaris Domini qui eduxit te de terra Aegypti de domo servitutis Dominum Deum tuum timebis et ipsi servies ac per nomen illius iurabis

vul@Deuteronomy:6:14 @ non ibitis post deos alienos cunctarum gentium quae in circuitu vestro sunt

vul@Deuteronomy:6:15 @ quoniam Deus aemulator Dominus Deus tuus in medio tui nequando irascatur furor Domini Dei tui contra te et auferat te de superficie terrae

vul@Deuteronomy:6:16 @ non temptabis Dominum Deum tuum sicut temptasti in loco temptationis

vul@Deuteronomy:6:17 @ custodi praecepta Domini Dei tui ac testimonia et caerimonias quas praecepit tibi

vul@Deuteronomy:6:18 @ et fac quod placitum est et bonum in conspectu Domini ut bene sit tibi et ingressus possideas terram optimam de qua iuravit Dominus patribus tuis

vul@Deuteronomy:6:19 @ ut deleret omnes inimicos tuos coram te sicut locutus est

vul@Deuteronomy:6:20 @ cum interrogaverit te filius tuus cras dicens quid sibi volunt testimonia haec et caerimoniae atque iudicia quae praecepit Dominus Deus noster nobis

vul@Deuteronomy:6:21 @ dices ei servi eramus Pharaonis in Aegypto et eduxit nos Dominus de Aegypto in manu forti

vul@Deuteronomy:6:22 @ fecitque signa atque prodigia magna et pessima in Aegypto contra Pharaonem et omnem domum illius in conspectu nostro

vul@Deuteronomy:6:23 @ et eduxit nos inde ut introductis daret terram super qua iuravit patribus nostris

vul@Deuteronomy:6:24 @ praecepitque nobis Dominus ut faciamus omnia legitima haec et timeamus Dominum Deum nostrum et bene sit nobis cunctis diebus vitae nostrae sicut est hodie

vul@Deuteronomy:6:25 @ eritque nostri misericors si custodierimus et fecerimus omnia praecepta eius coram Domino Deo nostro sicut mandavit nobis

Deuteronomy 6