Jeremiah 49
vul@Jeremiah:49:1 @ ad filios Ammon haec dicit Dominus numquid filii non sunt Israhel aut heres non est ei cur igitur hereditate possedit Melchom Gad et populus eius in urbibus eius habitavit
vul@Jeremiah:49:2 @ ideo ecce dies veniunt dicit Dominus et auditum faciam super Rabbath filiorum Ammon fremitum proelii et erit in tumulum dissipata filiaeque eius igni succendentur et possidebit Israhel possessores suos dicit Dominus
vul@Jeremiah:49:3 @ ulula Esebon quoniam vastata est Ahi clamate filiae Rabbath accingite vos ciliciis plangite et circuite per sepes quia Melchom in transmigratione ducetur sacerdotes eius et principes eius simul
vul@Jeremiah:49:4 @ quid gloriaris in vallibus defluxit vallis tua filia delicata quae confidebas in thesauris tuis et dicebas quis veniet ad me
vul@Jeremiah:49:5 @ ecce ego inducam super te terrorem ait Dominus Deus exercituum ab omnibus qui sunt in circuitu tuo et dispergemini singuli a conspectu vestro nec erit qui congreget fugientem
vul@Jeremiah:49:6 @ et post haec reverti faciam captivos filiorum Ammon ait Dominus
vul@Jeremiah:49:7 @ ad Idumeam haec dicit Dominus exercituum numquid non est ultra sapientia in Theman periit consilium a filiis inutilis facta est sapientia eorum
vul@Jeremiah:49:8 @ fugite terga vertite descendite in voragine habitatores Dedan quoniam perditionem Esau adduxi super eum tempus visitationis eius
vul@Jeremiah:49:9 @ si vindemiatores venissent super te non reliquissent racemum si fures in nocte rapuissent quod sufficeret sibi
vul@Jeremiah:49:10 @ ego vero discoperui Esau revelavi abscondita eius et celari non poterit vastatum est semen eius et fratres eius et vicini eius et non erit
vul@Jeremiah:49:11 @ relinque pupillos tuos ego eos faciam vivere et viduae tuae in me sperabunt
vul@Jeremiah:49:12 @ quia haec dicit Dominus ecce quibus non erat iudicium ut biberent calicem bibentes bibent et tu quasi innocens relinqueris non eris innocens sed bibens bibes
vul@Jeremiah:49:13 @ quia per memet ipsum iuravi dicit Dominus quod in solitudinem et in obprobrium et in desertum et in maledictionem erit Bosra et omnes civitates eius erunt in solitudines sempiternas
vul@Jeremiah:49:14 @ auditum audivi a Domino et legatus ad gentes missus est congregamini et venite contra eam et consurgamus in proelium
vul@Jeremiah:49:15 @ ecce enim parvulum dedi te in gentibus contemptibilem inter homines
vul@Jeremiah:49:16 @ arrogantia tua decepit te et superbia cordis tui qui habitas in cavernis petrae et adprehendere niteris altitudinem collis cum exaltaveris quasi aquila nidum tuum inde detraham te dicit Dominus
vul@Jeremiah:49:17 @ et erit Idumea deserta omnis qui transibit per eam stupebit et sibilabit super omnes plagas eius
vul@Jeremiah:49:18 @ sicuti subversa est Sodoma et Gomorra et vicinae eius ait Dominus non habitabit ibi vir et non incolet eam filius hominis
vul@Jeremiah:49:19 @ ecce quasi leo ascendet de superbia Iordanis ad pulchritudinem robustam quia subito currere eum faciam ad illam et quis erit electus quem praeponam ei quis enim similis mei et quis sustinebit me et quis est iste pastor qui resistat vultui meo
vul@Jeremiah:49:20 @ propterea audite consilium Domini quod iniit de Edom et cogitationes eius quas cogitavit de habitatoribus Theman si non deiecerint eos parvuli gregis nisi dissipaverint cum eis habitaculum eorum
vul@Jeremiah:49:21 @ a voce ruinae eorum commota est terra clamor in mari Rubro auditus est vocis eius
vul@Jeremiah:49:22 @ ecce quasi aquila ascendet et evolabit et expandet alas suas super Bosram et erit cor fortium Idumeae in die illa quasi cor mulieris parturientis
vul@Jeremiah:49:23 @ ad Damascum confusa est Emath et Arfad quia auditum pessimum audierunt turbati sunt in mari sollicitudine quiescere non potuit
vul@Jeremiah:49:24 @ dissoluta est Damascus versa in fugam tremor adprehendit eam angustia et dolores tenuerunt eam quasi parturientem
vul@Jeremiah:49:25 @ quomodo dereliquerunt civitatem laudabilem urbem laetitiae
vul@Jeremiah:49:26 @ ideo cadent iuvenes eius in plateis eius et omnes viri proelii conticescent in die illa ait Dominus exercituum
vul@Jeremiah:49:27 @ et succendam ignem in muro Damasci et devorabit moenia Benadad
vul@Jeremiah:49:28 @ ad Cedar et ad regna Asor quae percussit Nabuchodonosor rex Babylonis haec dicit Dominus surgite ascendite ad Cedar et vastate filios orientis
vul@Jeremiah:49:29 @ tabernacula eorum et greges eorum capient pelles eorum et omnia vasa eorum et camelos eorum tollent sibi et vocabunt super eos formidinem in circuitu
vul@Jeremiah:49:30 @ fugite abite vehementer in voraginibus sedete qui habitatis Asor ait Dominus iniit enim contra vos Nabuchodonosor rex Babylonis consilium et cogitavit adversum vos cogitationes
vul@Jeremiah:49:31 @ consurgite et ascendite ad gentem quietam et habitantem confidenter ait Dominus non ostia non vectes ei soli habitant
vul@Jeremiah:49:32 @ et erunt cameli eorum in direptionem et multitudo iumentorum in praedam et dispergam eos in omnem ventum qui sunt adtonsi in comam et ex omni confinio eorum adducam interitum super eos ait Dominus
vul@Jeremiah:49:33 @ et erit Asor in habitaculum draconum deserta usque in aeternum non manebit ibi vir nec incolet eam filius hominis
vul@Jeremiah:49:34 @ quod factum est verbum Domini ad Hieremiam prophetam adversus Aelam in principio regni Sedeciae regis Iuda dicens
vul@Jeremiah:49:35 @ haec dicit Dominus exercituum ecce ego confringam arcum Aelam summam fortitudinem eorum
vul@Jeremiah:49:36 @ et inducam super Aelam quattuor ventos a quattuor plagis caeli et ventilabo eos in omnes ventos istos et non erit gens ad quam non perveniant profugi Aelam
vul@Jeremiah:49:37 @ et pavere faciam Aelam coram inimicis suis et in conspectu quaerentium animam eorum et adducam super eos malum iram furoris mei dicit Dominus et emittam post eos gladium donec consumam eos
vul@Jeremiah:49:38 @ et ponam solium meum in Aelam et perdam inde reges et principes ait Dominus
vul@Jeremiah:49:39 @ in novissimis autem diebus reverti faciam captivos Aelam dicit Dominus