vul - 1Samuel:14:24-48

vul@1Samuel:14:24 @ et vir Israhel sociatus sibi est in die illa adiuravit autem Saul populum dicens maledictus vir qui comederit panem usque ad vesperam donec ulciscar de inimicis meis et non manducavit universus populus panem

vul@1Samuel:14:25 @ omneque terrae vulgus venit in saltum in quo erat mel super faciem agri

vul@1Samuel:14:26 @ ingressus est itaque populus saltum et apparuit fluens mel nullusque adplicuit manum ad os suum timebat enim populus iuramentum

vul@1Samuel:14:27 @ porro Ionathan non audierat cum adiuraret pater eius populum extenditque summitatem virgae quam habebat in manu et intinxit in favo mellis et convertit manum suam ad os suum et inluminati sunt oculi eius

vul@1Samuel:14:28 @ respondensque unus de populo ait iureiurando constrinxit pater tuus populum dicens maledictus qui comederit panem hodie defecerat autem populus

vul@1Samuel:14:29 @ dixitque Ionathan turbavit pater meus terram vidistis ipsi quia inluminati sunt oculi mei eo quod gustaverim paululum de melle isto

vul@1Samuel:14:30 @ quanto magis si comedisset populus de praeda inimicorum suorum quam repperit nonne maior facta fuisset plaga in Philisthim

vul@1Samuel:14:31 @ percusserunt ergo in die illa Philistheos a Machmis usque in Ahialon defatigatus est autem populus nimis

vul@1Samuel:14:32 @ et versus ad praedam tulit oves et boves et vitulos et mactaverunt in terra comeditque populus cum sanguine

vul@1Samuel:14:33 @ nuntiaverunt autem Saul dicentes quod populus peccasset Domino comedens cum sanguine qui ait praevaricati estis volvite ad me iam nunc saxum grande

vul@1Samuel:14:34 @ et dixit Saul dispergimini in vulgus et dicite eis ut adducat ad me unusquisque bovem suum et arietem et occidite super istud et vescimini et non peccabitis Domino comedentes cum sanguine adduxit itaque omnis populus unusquisque bovem in manu sua usque ad noctem et occiderunt ibi

vul@1Samuel:14:35 @ aedificavit autem Saul altare Domini tuncque primum coepit aedificare altare Domini

vul@1Samuel:14:36 @ et dixit Saul inruamus super Philisthim nocte et vastemus eos usque dum inlucescat mane nec relinquamus de eis virum dixitque populus omne quod bonum videtur in oculis tuis fac et ait sacerdos accedamus huc ad Deum

vul@1Samuel:14:37 @ et consuluit Saul Deum num persequar Philisthim si trades eos in manu Israhel et non respondit ei in die illa

vul@1Samuel:14:38 @ dixitque Saul adplicate huc universos angulos populi et scitote et videte per quem acciderit peccatum hoc hodie

vul@1Samuel:14:39 @ vivit Dominus salvator Israhel quia si per Ionathan filium meum factum est absque retractatione morietur ad quod nullus contradixit ei de omni populo

vul@1Samuel:14:40 @ et ait ad universum Israhel separamini vos in partem unam et ego cum Ionathan filio meo ero in parte una respondit populus ad Saul quod bonum videtur in oculis tuis fac

vul@1Samuel:14:41 @ et dixit Saul ad Dominum Deum Israhel da indicium et deprehensus est Ionathan et Saul populus autem exivit

vul@1Samuel:14:42 @ et ait Saul mittite sortem inter me et inter Ionathan filium meum et captus est Ionathan

vul@1Samuel:14:43 @ dixit autem Saul ad Ionathan indica mihi quid feceris et indicavit ei Ionathan et ait gustans gustavi in summitate virgae quae erat in manu mea paululum mellis et ecce ego morior

vul@1Samuel:14:44 @ et ait Saul haec faciat mihi Deus et haec addat quia morte morieris Ionathan

vul@1Samuel:14:45 @ dixitque populus ad Saul ergone Ionathan morietur qui fecit salutem hanc magnam in Israhel hoc nefas est vivit Dominus si ceciderit capillus de capite eius in terram quia cum Deo operatus est hodie liberavit ergo populus Ionathan ut non moreretur

vul@1Samuel:14:46 @ recessitque Saul nec persecutus est Philisthim porro Philisthim abierunt in loca sua

vul@1Samuel:14:47 @ at Saul confirmato regno super Israhel pugnabat per circuitum adversum omnes inimicos eius contra Moab et filios Ammon et Edom et reges Suba et Philistheos et quocumque se verterat superabat

vul@1Samuel:14:48 @ congregatoque exercitu percussit Amalech et eruit Israhel de manu vastatorum eius