vul - 2Chronicles:10:1-11:4

vul@2Chronicles:10:1 @ profectus est autem Roboam in Sychem illuc enim cunctus Israhel convenerat ut constituerent eum regem

vul@2Chronicles:10:2 @ quod cum audisset Hieroboam filius Nabath qui erat in Aegypto fugerat quippe illuc ante Salomonem statim reversus est

vul@2Chronicles:10:3 @ vocaveruntque eum et venit cum universo Israhel et locuti sunt ad Roboam dicentes

vul@2Chronicles:10:4 @ pater tuus durissimo iugo nos pressit tu leviora impera patre tuo qui nobis gravem inposuit servitutem et paululum de onere subleva ut serviamus tibi

vul@2Chronicles:10:5 @ qui ait post tres dies revertimini ad me cumque abisset populus

vul@2Chronicles:10:6 @ iniit consilium cum senibus qui steterant coram patre eius Salomone dum adviveret dicens quid datis consilii ut respondeam populo

vul@2Chronicles:10:7 @ qui dixerunt ei si placueris populo huic et lenieris eos verbis clementibus servient tibi omni tempore

vul@2Chronicles:10:8 @ at ille reliquit consilium senum et cum iuvenibus tractare coepit qui cum eo nutriti fuerant et erant in comitatu illius

vul@2Chronicles:10:9 @ dixitque ad eos quid vobis videtur vel respondere quid debeo populo huic qui dixit mihi subleva iugum quod inposuit nobis pater tuus

vul@2Chronicles:10:10 @ at illi responderunt ut iuvenes et nutriti cum eo in deliciis atque dixerunt sic loqueris populo qui dixit tibi pater tuus adgravavit iugum nostrum tu subleva et sic respondebis eis minimus digitus meus grossior est lumbis patris mei

vul@2Chronicles:10:11 @ pater meus inposuit vobis iugum grave et ego maius pondus adponam pater meus cecidit vos flagellis ego vero caedam scorpionibus

vul@2Chronicles:10:12 @ venit ergo Hieroboam et universus populus ad Roboam die tertio sicut praeceperat eis

vul@2Chronicles:10:13 @ responditque rex dura derelicto consilio seniorum

vul@2Chronicles:10:14 @ locutusque est iuxta iuvenum voluntatem pater meus grave vobis inposuit iugum quod ego gravius faciam pater meus cecidit vos flagellis ego vero caedam scorpionibus

vul@2Chronicles:10:15 @ et non adquievit populi precibus erat enim voluntatis Dei ut conpleretur sermo eius quem locutus fuerat per manum Ahiae Silonitis ad Hieroboam filium Nabath

vul@2Chronicles:10:16 @ populus autem universus rege duriora dicente sic locutus est ad eum non est nobis pars in David neque hereditas in filio Isai revertere in tabernacula tua Israhel tu autem pasce domum tuam David et abiit Israhel in tabernacula sua

vul@2Chronicles:10:17 @ super filios autem Israhel qui habitabant in civitatibus Iuda regnavit Roboam

vul@2Chronicles:10:18 @ misitque rex Roboam Aduram qui praeerat tributis et lapidaverunt eum filii Israhel et mortuus est porro rex Roboam currum festinavit ascendere et fugit in Hierusalem

vul@2Chronicles:10:19 @ recessitque Israhel a domo David usque ad diem hanc

vul@2Chronicles:11:1 @ venit autem Roboam in Hierusalem et convocavit universam domum Iuda et Beniamin in centum octoginta milibus electorum atque bellantium ut dimicaret contra Israhel et converteret ad se regnum suum

vul@2Chronicles:11:2 @ factusque est sermo Domini ad Semeiam hominem Dei dicens

vul@2Chronicles:11:3 @ loquere ad Roboam filium Salomonis regem Iuda et ad universum Israhel qui est in Iuda et Beniamin

vul@2Chronicles:11:4 @ haec dicit Dominus non ascendetis neque pugnabitis contra fratres vestros revertatur unusquisque in domum suam quia mea hoc gestum est voluntate qui cum audissent sermonem Domini reversi sunt nec perrexerunt contra Hieroboam