vul - 2Samuel:2:8-3:5

vul@2Samuel:2:8 @ Abner autem filius Ner princeps exercitus Saul tulit Hisboseth filium Saul et circumduxit eum per Castra

vul@2Samuel:2:9 @ regemque constituit super Galaad et super Gesuri et super Iezrahel et super Ephraim et super Beniamin et super Israhel universum

vul@2Samuel:2:10 @ quadraginta annorum erat Hisboseth filius Saul cum regnare coepisset super Israhel et duobus annis regnavit sola autem domus Iuda sequebatur David

vul@2Samuel:2:11 @ et fuit numerus dierum quos commoratus est David imperans in Hebron super domum Iuda septem annorum et sex mensuum

vul@2Samuel:2:12 @ egressusque Abner filius Ner et pueri Hisboseth filii Saul de Castris in Gabaon

vul@2Samuel:2:13 @ porro Ioab filius Sarviae et pueri David egressi sunt et occurrerunt eis iuxta piscinam Gabaon et cum in unum convenissent e regione sederunt hii ex una parte piscinae et illi ex altera

vul@2Samuel:2:14 @ dixitque Abner ad Ioab surgant pueri et ludant coram nobis et respondit Ioab surgant

vul@2Samuel:2:15 @ surrexerunt ergo et transierunt numero duodecim de Beniamin ex parte Hisboseth filii Saul et duodecim de pueris David

vul@2Samuel:2:16 @ adprehensoque unusquisque capite conparis sui defixit gladium in latus contrarii et ceciderunt simul vocatumque est nomen loci illius ager Robustorum in Gabaon

vul@2Samuel:2:17 @ et ortum est bellum durum satis in die illa fugatusque est Abner et viri Israhel a pueris David

vul@2Samuel:2:18 @ erant autem ibi tres filii Sarviae Ioab et Abisai et Asahel porro Asahel cursor velocissimus fuit quasi unus ex capreis quae morantur in silvis

vul@2Samuel:2:19 @ persequebatur autem Asahel Abner et non declinavit ad dexteram sive ad sinistram omittens persequi Abner

vul@2Samuel:2:20 @ respexit itaque Abner post tergum suum et ait tune es Asahel qui respondit ego sum

vul@2Samuel:2:21 @ dixitque ei Abner vade ad dextram sive ad sinistram et adprehende unum de adulescentibus et tolle tibi spolia eius noluit autem Asahel omittere quin urgueret eum

vul@2Samuel:2:22 @ rursumque locutus est Abner ad Asahel recede noli me sequi ne conpellar confodere te in terra et levare non potero faciem meam ad Ioab fratrem tuum

vul@2Samuel:2:23 @ qui audire contempsit et noluit declinare percussit ergo eum Abner aversa hasta in inguine et transfodit et mortuus est in eodem loco omnesque qui transiebant per locum in quo ceciderat Asahel et mortuus erat subsistebant

vul@2Samuel:2:24 @ persequentibus autem Ioab et Abisai fugientem Abner sol occubuit et venerunt usque ad collem Aquaeductus qui est ex adverso vallis et itineris deserti in Gabaon

vul@2Samuel:2:25 @ congregatique sunt filii Beniamin ad Abner et conglobati in unum cuneum steterunt in summitate tumuli unius

vul@2Samuel:2:26 @ et exclamavit Abner ad Ioab et ait num usque ad internicionem tuus mucro desaeviet an ignoras quod periculosa sit desperatio usquequo non dicis populo ut omittat persequi fratres suos

vul@2Samuel:2:27 @ et ait Ioab vivit Dominus si locutus fuisses mane recessisset populus persequens fratrem suum

vul@2Samuel:2:28 @ insonuit ergo Ioab bucina et stetit omnis exercitus nec persecuti sunt ultra Israhel neque iniere certamen

vul@2Samuel:2:29 @ Abner autem et viri eius abierunt per campestria tota nocte illa et transierunt Iordanem et lustrata omni Bethoron venerunt ad Castra

vul@2Samuel:2:30 @ porro Ioab reversus omisso Abner congregavit omnem populum et defuerunt de pueris David decem et novem viri excepto Asahele

vul@2Samuel:2:31 @ servi autem David percusserunt de Beniamin et de viris qui erant cum Abner trecentos sexaginta qui et mortui sunt

vul@2Samuel:2:32 @ tuleruntque Asahel et sepelierunt eum in sepulchro patris sui in Bethleem et ambulaverunt tota nocte Ioab et viri qui erant cum eo et in ipso crepusculo pervenerunt in Hebron

vul@2Samuel:3:1 @ facta est ergo longa concertatio inter domum Saul et inter domum David David proficiens et semper se ipso robustior domus autem Saul decrescens cotidie

vul@2Samuel:3:2 @ nati quoque sunt filii David in Hebron fuitque primogenitus eius Amnon de Ahinoem Iezrahelitide

vul@2Samuel:3:3 @ et post eum Chelaab de Abigail uxore Nabal Carmeli porro tertius Absalom filius Maacha filiae Tholomai regis Gessur

vul@2Samuel:3:4 @ quartus autem Adonias filius Aggith et quintus Safathia filius Abital

vul@2Samuel:3:5 @ sextus quoque Iethraam de Agla uxore David hii nati sunt David in Hebron