vul - Deuteronomy:1:26-46

vul@Deuteronomy:1:26 @ et noluistis ascendere sed increduli ad sermonem Domini Dei nostri

vul@Deuteronomy:1:27 @ murmurati estis in tabernaculis vestris atque dixistis odit nos Dominus et idcirco eduxit nos de terra Aegypti ut traderet in manu Amorrei atque deleret

vul@Deuteronomy:1:28 @ quo ascendemus nuntii terruerunt cor nostrum dicentes maxima multitudo est et nobis in statura procerior urbes magnae et ad caelum usque munitae filios Enacim vidimus ibi

vul@Deuteronomy:1:29 @ et dixi vobis nolite metuere nec timeatis eos

vul@Deuteronomy:1:30 @ Dominus Deus qui ductor est vester pro vobis ipse pugnabit sicut fecit in Aegypto videntibus cunctis

vul@Deuteronomy:1:31 @ et in solitudine ipse vidisti portavit te Dominus Deus tuus ut solet homo gestare parvulum filium suum in omni via per quam ambulasti donec veniretis ad locum istum

vul@Deuteronomy:1:32 @ et nec sic quidem credidistis Domino Deo vestro

vul@Deuteronomy:1:33 @ qui praecessit vos in via et metatus est locum in quo tentoria figere deberetis nocte ostendens vobis iter per ignem et die per columnam nubis

vul@Deuteronomy:1:34 @ cumque audisset Dominus vocem sermonum vestrorum iratus iuravit et ait

vul@Deuteronomy:1:35 @ non videbit quispiam de hominibus generationis huius pessimae terram bonam quam sub iuramento pollicitus sum patribus vestris

vul@Deuteronomy:1:36 @ praeter Chaleb filium Iepphonne ipse enim videbit eam et ipsi dabo terram quam calcavit et filiis eius quia secutus est Dominum

vul@Deuteronomy:1:37 @ nec miranda indignatio in populum cum mihi quoque iratus Dominus propter vos dixerit nec tu ingredieris illuc

vul@Deuteronomy:1:38 @ sed Iosue filius Nun minister tuus ipse intrabit pro te hunc exhortare et robora et ipse terram sorte dividat Israheli

vul@Deuteronomy:1:39 @ parvuli vestri de quibus dixistis quod captivi ducerentur et filii qui hodie boni ac mali ignorant distantiam ipsi ingredientur et ipsis dabo terram et possidebunt eam

vul@Deuteronomy:1:40 @ vos autem revertimini et abite in solitudinem per viam maris Rubri

vul@Deuteronomy:1:41 @ et respondistis mihi peccavimus Domino ascendemus atque pugnabimus sicut praecepit Dominus Deus noster cumque instructi armis pergeretis in montem

vul@Deuteronomy:1:42 @ ait mihi Dominus dic ad eos nolite ascendere neque pugnetis non enim sum vobiscum ne cadatis coram inimicis vestris

vul@Deuteronomy:1:43 @ locutus sum et non audistis sed adversantes imperio Domini et tumentes superbia ascendistis in montem

vul@Deuteronomy:1:44 @ itaque egressus Amorreus qui habitabat in montibus et obviam veniens persecutus est vos sicut solent apes persequi et cecidit de Seir usque Horma

vul@Deuteronomy:1:45 @ cumque reversi ploraretis coram Domino non audivit vos nec voci vestrae voluit adquiescere

vul@Deuteronomy:1:46 @ sedistis ergo in Cadesbarne multo tempore