vul - Deuteronomy:21-26

vul@Deuteronomy:21:1 @ quando inventum fuerit in terra quam Dominus Deus tuus daturus est tibi hominis cadaver occisi et ignoratur caedis reus

vul@Deuteronomy:21:2 @ egredientur maiores natu et iudices tui et metientur a loco cadaveris singularum per circuitum spatia civitatum

vul@Deuteronomy:21:3 @ et quam viciniorem ceteris esse perspexerint seniores civitatis eius tollent vitulam de armento quae non traxit iugum nec terram scidit vomere

vul@Deuteronomy:21:4 @ et ducent eam ad vallem asperam atque saxosam quae numquam arata est nec sementem recepit et caedent in ea cervices vitulae

vul@Deuteronomy:21:5 @ accedentque sacerdotes filii Levi quos elegerit Dominus Deus tuus ut ministrent ei et benedicant in nomine eius et ad verbum eorum omne negotium et quicquid mundum vel inmundum est iudicetur

vul@Deuteronomy:21:6 @ et maiores natu civitatis illius ad interfectum lavabuntque manus suas super vitulam quae in valle percussa est

vul@Deuteronomy:21:7 @ et dicent manus nostrae non effuderunt hunc sanguinem nec oculi viderunt

vul@Deuteronomy:21:8 @ propitius esto populo tuo Israhel quem redemisti Domine et non reputes sanguinem innocentem in medio populi tui Israhel et auferetur ab eis reatus sanguinis

vul@Deuteronomy:21:9 @ tu autem alienus eris ab innocentis cruore qui fusus est cum feceris quod praecepit Dominus

vul@Deuteronomy:21:10 @ si egressus fueris ad pugnam contra inimicos tuos et tradiderit eos Dominus Deus tuus in manu tua captivosque duxeris

vul@Deuteronomy:21:11 @ et videris in numero captivorum mulierem pulchram et adamaveris eam voluerisque habere uxorem

vul@Deuteronomy:21:12 @ introduces in domum tuam quae radet caesariem et circumcidet ungues

vul@Deuteronomy:21:13 @ et deponet vestem in qua capta est sedensque in domo tua flebit patrem et matrem suam uno mense et postea intrabis ad eam dormiesque cum illa et erit uxor tua

vul@Deuteronomy:21:14 @ sin autem postea non sederit animo tuo dimittes eam liberam nec vendere poteris pecunia nec opprimere per potentiam quia humiliasti eam

vul@Deuteronomy:21:15 @ si habuerit homo uxores duas unam dilectam et alteram odiosam genuerintque ex eo liberos et fuerit filius odiosae primogenitus

vul@Deuteronomy:21:16 @ volueritque substantiam inter filios suos dividere non poterit filium dilectae facere primogenitum et praeferre filio odiosae

vul@Deuteronomy:21:17 @ sed filium odiosae agnoscet primogenitum dabitque ei de his quae habuerit cuncta duplicia iste est enim principium liberorum eius et huic debentur primogenita

vul@Deuteronomy:21:18 @ si genuerit homo filium contumacem et protervum qui non audiat patris aut matris imperium et coercitus oboedire contempserit

vul@Deuteronomy:21:19 @ adprehendent eum et ducent ad seniores civitatis illius et ad portam iudicii

vul@Deuteronomy:21:20 @ dicentque ad eos filius noster iste protervus et contumax est monita nostra audire contemnit comesationibus vacat et luxuriae atque conviviis

vul@Deuteronomy:21:21 @ lapidibus eum obruet populus civitatis et morietur ut auferatis malum de medio vestri et universus Israhel audiens pertimescat

vul@Deuteronomy:21:22 @ quando peccaverit homo quod morte plectendum est et adiudicatus morti adpensus fuerit in patibulo

vul@Deuteronomy:21:23 @ non permanebit cadaver eius in ligno sed in eadem die sepelietur quia maledictus a Deo est qui pendet in ligno et nequaquam contaminabis terram tuam quam Dominus Deus tuus dederit tibi in possessionem

vul@Deuteronomy:22:1 @ non videbis bovem fratris tui aut ovem errantem et praeteribis sed reduces fratri tuo

vul@Deuteronomy:22:2 @ etiam si non est propinquus tuus frater nec nosti eum duces in domum tuam et erunt apud te quamdiu quaerat ea frater tuus et recipiat

vul@Deuteronomy:22:3 @ similiter facies de asino et de vestimento et de omni re fratris tui quae perierit si inveneris eam ne neglegas quasi alienam

vul@Deuteronomy:22:4 @ si videris asinum fratris tui aut bovem cecidisse in via non despicies sed sublevabis cum eo

vul@Deuteronomy:22:5 @ non induetur mulier veste virili nec vir utetur veste feminea abominabilis enim apud Deum est qui facit haec

vul@Deuteronomy:22:6 @ si ambulans per viam in arbore vel in terra nidum avis inveneris et matrem pullis vel ovis desuper incubantem non tenebis eam cum filiis

vul@Deuteronomy:22:7 @ sed abire patieris captos tenens filios ut bene sit tibi et longo vivas tempore

vul@Deuteronomy:22:8 @ cum aedificaveris domum novam facies murum tecti per circuitum ne effundatur sanguis in domo tua et sis reus labente alio et in praeceps ruente

vul@Deuteronomy:22:9 @ non seres vineam tuam altero semine ne et sementis quam sevisti et quae nascuntur ex vinea pariter sanctificentur

vul@Deuteronomy:22:10 @ non arabis in bove simul et asino

vul@Deuteronomy:22:11 @ non indueris vestimento quod ex lana linoque contextum est

vul@Deuteronomy:22:12 @ funiculos in fimbriis facies per quattuor angulos pallii tui quo operieris

vul@Deuteronomy:22:13 @ si duxerit vir uxorem et postea eam odio habuerit

vul@Deuteronomy:22:14 @ quaesieritque occasiones quibus dimittat eam obiciens ei nomen pessimum et dixerit uxorem hanc accepi et ingressus ad eam non inveni virginem

vul@Deuteronomy:22:15 @ tollent eam pater et mater eius et ferent secum signa virginitatis eius ad seniores urbis qui in porta sunt

vul@Deuteronomy:22:16 @ et dicet pater filiam meam dedi huic uxorem quam quia odit

vul@Deuteronomy:22:17 @ inponet ei nomen pessimum ut dicat non inveni filiam tuam virginem et ecce haec sunt signa virginitatis filiae meae expandent vestimentum coram senibus civitatis

vul@Deuteronomy:22:18 @ adprehendentque senes urbis illius virum et verberabunt illum

vul@Deuteronomy:22:19 @ condemnantes insuper centum siclis argenti quos dabit patri puellae quoniam diffamavit nomen pessimum super virginem Israhel habebitque eam uxorem et non poterit dimittere omni tempore vitae suae

vul@Deuteronomy:22:20 @ quod si verum est quod obicit et non est in puella inventa virginitas

vul@Deuteronomy:22:21 @ eicient eam extra fores domus patris sui et lapidibus obruent viri civitatis eius et morietur quoniam fecit nefas in Israhel ut fornicaretur in domo patris sui et auferes malum de medio tui

vul@Deuteronomy:22:22 @ si dormierit vir cum uxore alterius uterque morientur id est adulter et adultera et auferes malum de Israhel

vul@Deuteronomy:22:23 @ si puellam virginem desponderit vir et invenerit eam aliquis in civitate et concubuerit cum illa

vul@Deuteronomy:22:24 @ educes utrumque ad portam civitatis illius et lapidibus obruentur puella quia non clamavit cum esset in civitate vir quia humiliavit uxorem proximi sui et auferes malum de medio tui

vul@Deuteronomy:22:25 @ sin autem in agro reppererit vir puellam quae desponsata est et adprehendens concubuerit cum illa ipse morietur solus

vul@Deuteronomy:22:26 @ puella nihil patietur nec est rea mortis quoniam sicut latro consurgit contra fratrem suum et occidit animam eius ita et puella perpessa est

vul@Deuteronomy:22:27 @ sola erat in agro clamavit et nullus adfuit qui liberaret eam

vul@Deuteronomy:22:28 @ si invenerit vir puellam virginem quae non habet sponsum et adprehendens concubuerit cum ea et res ad iudicium venerit

vul@Deuteronomy:22:29 @ dabit qui dormivit cum ea patri puellae quinquaginta siclos argenti et habebit eam uxorem quia humiliavit illam non poterit dimittere cunctis diebus vitae suae

vul@Deuteronomy:22:30 @ non accipiet homo uxorem patris sui nec revelabit operimentum eius

vul@Deuteronomy:23:1 @ non intrabit eunuchus adtritis vel amputatis testiculis et absciso veretro ecclesiam Domini

vul@Deuteronomy:23:2 @ non ingredietur mamzer hoc est de scorto natus in ecclesiam Domini usque ad decimam generationem

vul@Deuteronomy:23:3 @ Ammanites et Moabites etiam post decimam generationem non intrabunt ecclesiam Domini in aeternum

vul@Deuteronomy:23:4 @ quia noluerunt vobis occurrere cum pane et aqua in via quando egressi estis de Aegypto et quia conduxerunt contra te Balaam filium Beor de Mesopotamiam Syriae ut malediceret tibi

vul@Deuteronomy:23:5 @ et noluit Dominus Deus tuus audire Balaam vertitque maledictionem eius in benedictionem tuam eo quod diligeret te

vul@Deuteronomy:23:6 @ non facies cum eis pacem nec quaeres eis bona cunctis diebus vitae tuae in sempiternum

vul@Deuteronomy:23:7 @ non abominaberis Idumeum quia frater tuus est nec Aegyptium quia advena fuisti in terra eius

vul@Deuteronomy:23:8 @ qui nati fuerint ex eis tertia generatione intrabunt ecclesiam Domini

vul@Deuteronomy:23:9 @ quando egressus fueris adversus hostes tuos in pugnam custodies te ab omni re mala

vul@Deuteronomy:23:10 @ si fuerit inter vos homo qui nocturno pollutus sit somnio egredietur extra castra

vul@Deuteronomy:23:11 @ et non revertetur priusquam ad vesperam lavetur aqua et post solis occasum regredietur in castra

vul@Deuteronomy:23:12 @ habebis locum extra castra ad quem egrediaris ad requisita naturae

vul@Deuteronomy:23:13 @ gerens paxillum in balteo cumque sederis fodies per circuitum et egesta humo operies

vul@Deuteronomy:23:14 @ quo relevatus es Dominus enim Deus tuus ambulat in medio castrorum ut eruat te et tradat tibi inimicos tuos ut sint castra tua sancta et nihil in eis appareat foeditatis nec derelinquat te

vul@Deuteronomy:23:15 @ non trades servum domino suo qui ad te confugerit

vul@Deuteronomy:23:16 @ habitabit tecum in loco qui ei placuerit et in una urbium tuarum requiescet nec contristes eum

vul@Deuteronomy:23:17 @ non erit meretrix de filiabus Israhel neque scortator de filiis Israhel

vul@Deuteronomy:23:18 @ non offeres mercedem prostibuli nec pretium canis in domum Domini Dei tui quicquid illud est quod voverint quia abominatio est utrumque apud Dominum Deum tuum

vul@Deuteronomy:23:19 @ non fenerabis fratri tuo ad usuram pecuniam nec fruges nec quamlibet aliam rem

vul@Deuteronomy:23:20 @ sed alieno fratri autem tuo absque usura id quod indiget commodabis ut benedicat tibi Dominus Deus tuus in omni opere tuo in terra ad quam ingredieris possidendam

vul@Deuteronomy:23:21 @ cum voveris votum Domino Deo tuo non tardabis reddere quia requiret illud Dominus Deus tuus et si moratus fueris reputabit tibi in peccatum

vul@Deuteronomy:23:22 @ si nolueris polliceri absque peccato eris

vul@Deuteronomy:23:23 @ quod autem semel egressum est de labiis tuis observabis et facies sicut promisisti Domino Deo tuo et propria voluntate et ore tuo locutus es

vul@Deuteronomy:23:24 @ ingressus vineam proximi tui comede uvas quantum tibi placuerit foras autem ne efferas tecum

vul@Deuteronomy:23:25 @ si intraveris in segetem amici tui franges spicas et manu conteres falce autem non metes

vul@Deuteronomy:24:1 @ si acceperit homo uxorem et habuerit eam et non invenerit gratiam ante oculos eius propter aliquam foeditatem scribet libellum repudii et dabit in manu illius et dimittet eam de domo sua

vul@Deuteronomy:24:2 @ cumque egressa alterum maritum duxerit

vul@Deuteronomy:24:3 @ et ille quoque oderit eam dederitque ei libellum repudii et dimiserit de domo sua vel certe mortuus fuerit

vul@Deuteronomy:24:4 @ non poterit prior maritus recipere eam in uxorem quia polluta est et abominabilis facta est coram Domino ne peccare facias terram tuam quam Dominus Deus tuus tibi tradiderit possidendam

vul@Deuteronomy:24:5 @ cum acceperit homo nuper uxorem non procedet ad bellum nec ei quippiam necessitatis iniungetur publicae sed vacabit absque culpa domui suae ut uno anno laetetur cum uxore sua

vul@Deuteronomy:24:6 @ non accipies loco pignoris inferiorem et superiorem molam quia animam suam adposuit tibi

vul@Deuteronomy:24:7 @ si deprehensus fuerit homo sollicitans fratrem suum de filiis Israhel et vendito eo accipiens pretium interficietur et auferes malum de medio tui

vul@Deuteronomy:24:8 @ observa diligenter ne incurras in plagam leprae sed facies quaecumque docuerint te sacerdotes levitici generis iuxta id quod praecepi eis et imple sollicite

vul@Deuteronomy:24:9 @ mementote quae fecerit Dominus Deus vester Mariae in via cum egrederemini de Aegypto

vul@Deuteronomy:24:10 @ cum repetes a proximo tuo rem aliquam quam debet tibi non ingredieris domum eius ut pignus auferas

vul@Deuteronomy:24:11 @ sed stabis foris et ille tibi proferet quod habuerit

vul@Deuteronomy:24:12 @ sin autem pauper est non pernoctabit apud te pignus

vul@Deuteronomy:24:13 @ sed statim reddes ei ante solis occasum ut dormiens in vestimento suo benedicat tibi et habeas iustitiam coram Domino Deo tuo

vul@Deuteronomy:24:14 @ non negabis mercedem indigentis et pauperis fratris tui sive advenae qui tecum moratur in terra et intra portas tuas est

vul@Deuteronomy:24:15 @ sed eadem die reddes ei pretium laboris sui ante solis occasum quia pauper est et ex eo sustentat animam suam ne clamet contra te ad Dominum et reputetur tibi in peccatum

vul@Deuteronomy:24:16 @ non occidentur patres pro filiis nec filii pro patribus sed unusquisque pro suo peccato morietur

vul@Deuteronomy:24:17 @ non pervertes iudicium advenae et pupilli nec auferes pignoris loco viduae vestimentum

vul@Deuteronomy:24:18 @ memento quod servieris in Aegypto et eruerit te Dominus Deus tuus inde idcirco praecipio tibi ut facias hanc rem

vul@Deuteronomy:24:19 @ quando messueris segetem in agro tuo et oblitus manipulum reliqueris non reverteris ut tollas eum sed advenam et pupillum et viduam auferre patieris ut benedicat tibi Dominus Deus tuus in omni opere manuum tuarum

vul@Deuteronomy:24:20 @ si fruges colliges olivarum quicquid remanserit in arboribus non reverteris ut colligas sed relinques advenae pupillo ac viduae

vul@Deuteronomy:24:21 @ si vindemiaveris vineam tuam non colliges remanentes racemos sed cedent in usus advenae pupilli ac viduae

vul@Deuteronomy:24:22 @ memento quod et tu servieris in Aegypto et idcirco praecipiam tibi ut facias hanc rem

vul@Deuteronomy:25:1 @ si fuerit causa inter aliquos et interpellaverint iudices quem iustum esse perspexerint illi iustitiae palmam dabunt quem impium condemnabunt impietatis

vul@Deuteronomy:25:2 @ sin autem eum qui peccavit dignum viderint plagis prosternent et coram se facient verberari pro mensura peccati erit et plagarum modus

vul@Deuteronomy:25:3 @ ita dumtaxat ut quadragenarium numerum non excedant ne foede laceratus ante oculos tuos abeat frater tuus

vul@Deuteronomy:25:4 @ non ligabis os bovis terentis in area fruges tuas

vul@Deuteronomy:25:5 @ quando habitaverint fratres simul et unus ex eis absque liberis mortuus fuerit uxor defuncti non nubet alteri sed accipiet eam frater eius et suscitabit semen fratris sui

vul@Deuteronomy:25:6 @ et primogenitum ex ea filium nomine illius appellabit ut non deleatur nomen eius ex Israhel

vul@Deuteronomy:25:7 @ sin autem noluerit accipere uxorem fratris sui quae ei lege debetur perget mulier ad portam civitatis et interpellabit maiores natu dicetque non vult frater viri mei suscitare nomen fratris sui in Israhel nec me in coniugium sumere

vul@Deuteronomy:25:8 @ statimque accersiri eum facient et interrogabunt si responderit nolo eam uxorem accipere

vul@Deuteronomy:25:9 @ accedet mulier ad eum coram senioribus et tollet calciamentum de pede eius spuetque in faciem illius et dicet sic fit homini qui non aedificat domum fratris sui

vul@Deuteronomy:25:10 @ et vocabitur nomen illius in Israhel domus Disculciati

vul@Deuteronomy:25:11 @ si habuerint inter se iurgium viri et unus contra alterum rixari coeperit volensque uxor alterius eruere virum suum de manu fortioris miserit manum et adprehenderit verenda eius

vul@Deuteronomy:25:12 @ abscides manum illius nec flecteris super eam ulla misericordia

vul@Deuteronomy:25:13 @ non habebis in sacculo diversa pondera maius et minus

vul@Deuteronomy:25:14 @ nec erit in domo tua modius maior et minor

vul@Deuteronomy:25:15 @ pondus habebis iustum et verum et modius aequalis et verus erit tibi ut multo vivas tempore super terram quam Dominus Deus tuus dederit tibi

vul@Deuteronomy:25:16 @ abominatur enim Dominus eum qui facit haec et aversatur omnem iniustitiam

vul@Deuteronomy:25:17 @ memento quae fecerit tibi Amalech in via quando egrediebaris ex Aegypto

vul@Deuteronomy:25:18 @ quomodo occurrerit tibi et extremos agminis tui qui lassi residebant ceciderit quando tu eras fame et labore confectus et non timuerit Deum

vul@Deuteronomy:25:19 @ cum ergo Dominus Deus tuus dederit tibi requiem et subiecerit cunctas per circuitum nationes in terra quam tibi pollicitus est delebis nomen eius sub caelo cave ne obliviscaris

vul@Deuteronomy:26:1 @ cumque intraveris terram quam Dominus Deus tuus tibi daturus est possidendam et obtinueris eam atque habitaveris in illa

vul@Deuteronomy:26:2 @ tolles de cunctis frugibus primitias et pones in cartallo pergesque ad locum quem Dominus Deus tuus elegerit ut ibi invocetur nomen eius

vul@Deuteronomy:26:3 @ accedesque ad sacerdotem qui fuerit in diebus illis et dices ad eum profiteor hodie coram Domino Deo tuo quod ingressus sim terram pro qua iuravit patribus nostris ut daret eam nobis

vul@Deuteronomy:26:4 @ suscipiensque sacerdos cartallum de manu eius ponet ante altare Domini Dei tui

vul@Deuteronomy:26:5 @ et loqueris in conspectu Domini Dei tui Syrus persequebatur patrem meum qui descendit in Aegyptum et ibi peregrinatus est in paucissimo numero crevitque in gentem magnam et robustam et infinitae multitudinis

vul@Deuteronomy:26:6 @ adflixeruntque nos Aegyptii et persecuti sunt inponentes onera gravissima

vul@Deuteronomy:26:7 @ et clamavimus ad Dominum Deum patrum nostrorum qui exaudivit nos et respexit humilitatem nostram et laborem atque angustias

vul@Deuteronomy:26:8 @ et eduxit nos de Aegypto in manu forti et brachio extento in ingenti pavore in signis atque portentis

vul@Deuteronomy:26:9 @ et introduxit ad locum istum et tradidit nobis terram lacte et melle manantem

vul@Deuteronomy:26:10 @ et idcirco nunc offero primitias frugum terrae quam dedit Dominus mihi et dimittes eas in conspectu Domini Dei tui adorato Domino Deo tuo

vul@Deuteronomy:26:11 @ et epulaberis in omnibus bonis quae Dominus Deus tuus dederit tibi et domui tuae tu et Levites et advena qui tecum est

vul@Deuteronomy:26:12 @ quando conpleveris decimam cunctarum frugum tuarum anno decimarum tertio dabis Levitae et advenae et pupillo et viduae ut comedant intra portas tuas et saturentur

vul@Deuteronomy:26:13 @ loquerisque in conspectu Domini Dei tui abstuli quod sanctificatum est de domo mea et dedi illud Levitae et advenae pupillo et viduae sicut iussisti mihi non praeterivi mandata tua nec sum oblitus imperii

vul@Deuteronomy:26:14 @ non comedi ex eis in luctu meo nec separavi ea in qualibet inmunditia nec expendi ex his quicquam in re funebri oboedivi voci Domini Dei mei et feci omnia sicut praecepisti mihi

vul@Deuteronomy:26:15 @ respice de sanctuario tuo de excelso caelorum habitaculo et benedic populo tuo Israhel et terrae quam dedisti nobis sicut iurasti patribus nostris terrae lacte et melle mananti

vul@Deuteronomy:26:16 @ hodie Dominus Deus tuus praecepit tibi ut facias mandata haec atque iudicia et custodias et impleas ex toto corde tuo et ex tota anima tua

vul@Deuteronomy:26:17 @ Dominum elegisti hodie ut sit tibi Deus et ambules in viis eius et custodias caerimonias illius et mandata atque iudicia et oboedias eius imperio

vul@Deuteronomy:26:18 @ et Dominus elegit te hodie ut sis ei populus peculiaris sicut locutus est tibi et custodias omnia praecepta eius

vul@Deuteronomy:26:19 @ et faciat te excelsiorem cunctis gentibus quas creavit in laudem et nomen et gloriam suam ut sis populus sanctus Domini Dei tui sicut locutus est

vul@Deuteronomy:27:1 @ praecepit autem Moses et seniores Israhel populo dicentes custodite omne mandatum quod praecipio vobis hodie