vul - Deuteronomy:4:44-5:33

vul@Deuteronomy:4:44 @ ista est lex quam proposuit Moses coram filiis Israhel

vul@Deuteronomy:4:45 @ et haec testimonia et caerimoniae atque iudicia quae locutus est ad filios Israhel quando egressi sunt de Aegypto

vul@Deuteronomy:4:46 @ trans Iordanem in valle contra fanum Phogor in terra Seon regis Amorrei qui habitavit in Esebon quem percussit Moses filii quoque Israhel egressi ex Aegypto

vul@Deuteronomy:4:47 @ possederunt terram eius et terram Og regis Basan duorum regum Amorreorum qui erant trans Iordanem ad solis ortum

vul@Deuteronomy:4:48 @ ab Aroer quae sita est super ripam torrentis Arnon usque ad montem Sion qui est et Hermon

vul@Deuteronomy:4:49 @ omnem planitiem trans Iordanem ad orientalem plagam usque ad mare Solitudinis et usque ad radices montis Phasga

vul@Deuteronomy:5:1 @ vocavitque Moses omnem Israhelem et dixit ad eum audi Israhel caerimonias atque iudicia quae ego loquor in auribus vestris hodie discite ea et opere conplete

vul@Deuteronomy:5:2 @ Dominus Deus noster pepigit nobiscum foedus in Horeb

vul@Deuteronomy:5:3 @ non cum patribus nostris iniit pactum sed nobiscum qui inpraesentiarum sumus et vivimus

vul@Deuteronomy:5:4 @ facie ad faciem locutus est nobis in monte de medio ignis

vul@Deuteronomy:5:5 @ ego sequester et medius fui inter Dominum et vos in tempore illo ut adnuntiarem vobis verba eius timuistis enim ignem et non ascendistis in montem et ait

vul@Deuteronomy:5:6 @ ego Dominus Deus tuus qui eduxi te de terra Aegypti de domo servitutis

vul@Deuteronomy:5:7 @ non habebis deos alienos in conspectu meo

vul@Deuteronomy:5:8 @ non facies tibi sculptile nec similitudinem omnium quae in caelo sunt desuper et quae in terra deorsum et quae versantur in aquis sub terra

vul@Deuteronomy:5:9 @ non adorabis ea et non coles ego enim sum Dominus Deus tuus Deus aemulator reddens iniquitatem patrum super filios in tertiam et quartam generationem his qui oderunt me

vul@Deuteronomy:5:10 @ et faciens misericordiam in multa milia diligentibus me et custodientibus praecepta mea

vul@Deuteronomy:5:11 @ non usurpabis nomen Domini Dei tui frustra quia non erit inpunitus qui super re vana nomen eius adsumpserit

vul@Deuteronomy:5:12 @ observa diem sabbati ut sanctifices eum sicut praecepit tibi Dominus Deus tuus

vul@Deuteronomy:5:13 @ sex diebus operaberis et facies omnia opera tua

vul@Deuteronomy:5:14 @ septimus dies sabbati est id est requies Domini Dei tui non facies in eo quicquam operis tu et filius tuus et filia servus et ancilla et bos et asinus et omne iumentum tuum et peregrinus qui est intra portas tuas ut requiescat servus et ancilla tua sicut et tu

vul@Deuteronomy:5:15 @ memento quod et ipse servieris in Aegypto et eduxerit te inde Dominus Deus tuus in manu forti et brachio extento idcirco praecepit tibi ut observares diem sabbati

vul@Deuteronomy:5:16 @ honora patrem tuum et matrem sicut praecepit tibi Dominus Deus tuus ut longo vivas tempore et bene sit tibi in terra quam Dominus Deus tuus daturus est tibi

vul@Deuteronomy:5:17 @ non occides

vul@Deuteronomy:5:18 @ neque moechaberis

vul@Deuteronomy:5:19 @ furtumque non facies

vul@Deuteronomy:5:20 @ nec loqueris contra proximum tuum falsum testimonium

vul@Deuteronomy:5:21 @ non concupisces uxorem proximi tui non domum non agrum non servum non ancillam non bovem non asinum et universa quae illius sunt

vul@Deuteronomy:5:22 @ haec verba locutus est Dominus ad omnem multitudinem vestram in monte de medio ignis et nubis et caliginis voce magna nihil addens amplius et scripsit ea in duabus tabulis lapideis quas tradidit mihi

vul@Deuteronomy:5:23 @ vos autem postquam audistis vocem de medio tenebrarum et montem ardere vidistis accessistis ad me omnes principes tribuum et maiores natu atque dixistis

vul@Deuteronomy:5:24 @ ecce ostendit nobis Dominus Deus noster maiestatem et magnitudinem suam vocem eius audivimus de medio ignis et probavimus hodie quod loquente Deo cum homine vixerit homo

vul@Deuteronomy:5:25 @ cur ergo morimur et devorabit nos ignis hic maximus si enim audierimus ultra vocem Domini Dei nostri moriemur

vul@Deuteronomy:5:26 @ quid est omnis caro ut audiat vocem Dei viventis qui de medio ignis loquitur sicut nos audivimus et possit vivere

vul@Deuteronomy:5:27 @ tu magis accede et audi cuncta quae dixerit Dominus Deus noster tibi loquerisque ad nos et nos audientes faciemus ea

vul@Deuteronomy:5:28 @ quod cum audisset Dominus ait ad me audivi vocem verborum populi huius quae locuti sunt tibi bene omnia sunt locuti

vul@Deuteronomy:5:29 @ quis det talem eos habere mentem ut timeant me et custodiant universa mandata mea in omni tempore ut bene sit eis et filiis eorum in sempiternum

vul@Deuteronomy:5:30 @ vade et dic eis revertimini in tentoria vestra

vul@Deuteronomy:5:31 @ tu vero hic sta mecum et loquar tibi omnia mandata et caerimonias atque iudicia quae docebis eos ut faciant ea in terra quam dabo illis in possessionem

vul@Deuteronomy:5:32 @ custodite igitur et facite quae praecepit Dominus Deus vobis non declinabitis neque ad dextram neque ad sinistram

vul@Deuteronomy:5:33 @ sed per viam quam praecepit Dominus Deus vester ambulabitis ut vivatis et bene sit vobis et protelentur dies in terra possessionis vestrae