Hebrews:10
vul@Hebrews:10:1 @ umbram enim habens lex bonorum futurorum non ipsam imaginem rerum per singulos annos hisdem ipsis hostiis quas offerunt indesinenter numquam potest accedentes perfectos facere
vul@Hebrews:10:2 @ alioquin non cessassent offerri ideo quod nullam haberent ultra conscientiam peccati cultores semel mundati
vul@Hebrews:10:3 @ sed in ipsis commemoratio peccatorum per singulos annos fit
vul@Hebrews:10:4 @ inpossibile enim est sanguine taurorum et hircorum auferri peccata
vul@Hebrews:10:5 @ ideo ingrediens mundum dicit hostiam et oblationem noluisti corpus autem aptasti mihi
vul@Hebrews:10:6 @ holocaustomata et pro peccato non tibi placuit
vul@Hebrews:10:7 @ tunc dixi ecce venio in capitulo libri scriptum est de me ut faciam Deus voluntatem tuam
vul@Hebrews:10:8 @ superius dicens quia hostias et oblationes et holocaustomata et pro peccato noluisti nec placita sunt tibi quae secundum legem offeruntur
vul@Hebrews:10:9 @ tunc dixit ecce venio ut faciam Deus voluntatem tuam aufert primum ut sequens statuat
vul@Hebrews:10:10 @ in qua voluntate sanctificati sumus per oblationem corporis Christi Iesu in semel
vul@Hebrews:10:11 @ et omnis quidem sacerdos praesto est cotidie ministrans et easdem saepe offerens hostias quae numquam possunt auferre peccata
vul@Hebrews:10:12 @ hic autem unam pro peccatis offerens hostiam in sempiternum sedit in dextera Dei
vul@Hebrews:10:13 @ de cetero expectans donec ponantur inimici eius scabillum pedum eius
vul@Hebrews:10:14 @ una enim oblatione consummavit in sempiternum sanctificatos
vul@Hebrews:10:15 @ contestatur autem nos et Spiritus Sanctus postquam enim dixit
vul@Hebrews:10:16 @ hoc autem testamentum quod testabor ad illos post dies illos dicit Dominus dando leges meas in cordibus eorum et in mente eorum superscribam eas
vul@Hebrews:10:17 @ et peccatorum et iniquitatium eorum iam non recordabor amplius
vul@Hebrews:10:18 @ ubi autem horum remissio iam non oblatio pro peccato
vul@Hebrews:10:19 @ habentes itaque fratres fiduciam in introitu sanctorum in sanguine Christi
vul@Hebrews:10:20 @ quam initiavit nobis viam novam et viventem per velamen id est carnem suam
vul@Hebrews:10:21 @ et sacerdotem magnum super domum Dei
vul@Hebrews:10:22 @ accedamus cum vero corde in plenitudine fidei aspersi corda a conscientia mala et abluti corpus aqua munda
vul@Hebrews:10:23 @ teneamus spei nostrae confessionem indeclinabilem fidelis enim est qui repromisit
vul@Hebrews:10:24 @ et consideremus invicem in provocationem caritatis et bonorum operum
vul@Hebrews:10:25 @ non deserentes collectionem nostram sicut est consuetudinis quibusdam sed consolantes et tanto magis quanto videritis adpropinquantem diem
vul@Hebrews:10:26 @ voluntarie enim peccantibus nobis post acceptam notitiam veritatis iam non relinquitur pro peccatis hostia
vul@Hebrews:10:27 @ terribilis autem quaedam expectatio iudicii et ignis aemulatio quae consumptura est adversarios
vul@Hebrews:10:28 @ irritam quis faciens legem Mosi sine ulla miseratione duobus vel tribus testibus moritur
vul@Hebrews:10:29 @ quanto magis putatis deteriora mereri supplicia qui Filium Dei conculcaverit et sanguinem testamenti pollutum duxerit in quo sanctificatus est et Spiritui gratiae contumeliam fecerit
vul@Hebrews:10:30 @ scimus enim qui dixit mihi vindictam ego reddam et iterum quia iudicabit Dominus populum suum
vul@Hebrews:10:31 @ horrendum est incidere in manus Dei viventis
vul@Hebrews:10:32 @ rememoramini autem pristinos dies in quibus inluminati magnum certamen sustinuistis passionum
vul@Hebrews:10:33 @ et in altero quidem obprobriis et tribulationibus spectaculum facti in altero autem socii taliter conversantium effecti
vul@Hebrews:10:34 @ nam et vinctis conpassi estis et rapinam bonorum vestrorum cum gaudio suscepistis cognoscentes vos habere meliorem et manentem substantiam
vul@Hebrews:10:35 @ nolite itaque amittere confidentiam vestram quae magnam habet remunerationem
vul@Hebrews:10:36 @ patientia enim vobis necessaria est ut voluntatem Dei facientes reportetis promissionem
vul@Hebrews:10:37 @ adhuc enim modicum quantulum qui venturus est veniet et non tardabit
vul@Hebrews:10:38 @ iustus autem meus ex fide vivit quod si subtraxerit se non placebit animae meae
vul@Hebrews:10:39 @ nos autem non sumus subtractionis in perditionem sed fidei in adquisitionem animae