Jeremiah:4:5-31
vul@Jeremiah:4:5 @ adnuntiate in Iuda et in Hierusalem auditum facite loquimini et canite tuba in terra clamate fortiter dicite congregamini et ingrediamur civitates munitas
vul@Jeremiah:4:6 @ levate signum in Sion confortamini nolite stare quia malum ego adduco ab aquilone et contritionem magnam
vul@Jeremiah:4:7 @ ascendit leo de cubili suo et praedo gentium se levavit egressus est de loco suo ut ponat terram tuam in desolationem civitates tuae vastabuntur remanentes absque habitatore
vul@Jeremiah:4:8 @ super hoc accingite vos ciliciis plangite et ululate quia non est aversa ira furoris Domini a nobis
vul@Jeremiah:4:9 @ et erit in die illa dicit Dominus peribit cor regis et cor principum et obstupescent sacerdotes et prophetae consternabuntur
vul@Jeremiah:4:10 @ et dixi heu heu heu Domine Deus ergone decepisti populum istum et Hierusalem dicens pax erit vobis et ecce pervenit gladius usque ad animam
vul@Jeremiah:4:11 @ in tempore illo dicetur populo huic et Hierusalem ventus urens in viis quae sunt in deserto viae filiae populi mei non ad ventilandum et ad purgandum
vul@Jeremiah:4:12 @ spiritus plenus ex his veniet mihi et nunc ego sed loquar iudicia mea cum eis
vul@Jeremiah:4:13 @ ecce quasi nubes ascendet et quasi tempestas currus eius velociores aquilis equi illius vae nobis quoniam vastati sumus
vul@Jeremiah:4:14 @ lava a malitia cor tuum Hierusalem ut salva fias usquequo morabuntur in te cogitationes noxiae
vul@Jeremiah:4:15 @ vox enim adnuntiantis a Dan et notum facientis idolum de monte Ephraim
vul@Jeremiah:4:16 @ concitate gentes ecce auditum est in Hierusalem custodes venire de terra longinqua et dare super civitates Iuda vocem suam
vul@Jeremiah:4:17 @ quasi custodes agrorum facti sunt super eam in gyro quia me ad iracundiam provocavit ait Dominus
vul@Jeremiah:4:18 @ viae tuae et cogitationes tuae fecerunt haec tibi ista malitia tua quia amara quia tetigit cor tuum
vul@Jeremiah:4:19 @ ventrem meum ventrem meum doleo sensus cordis mei turbati sunt in me non tacebo quoniam vocem bucinae audivit anima mea clamorem proelii
vul@Jeremiah:4:20 @ contritio super contritionem vocata est et vastata est omnis terra repente vastata sunt tabernacula mea subito pelles meae
vul@Jeremiah:4:21 @ usquequo videbo fugientem audiam vocem bucinae
vul@Jeremiah:4:22 @ quia stultus populus meus me non cognovit filii insipientes sunt et vecordes sapientes sunt ut faciant mala bene autem facere nescierunt
vul@Jeremiah:4:23 @ aspexi terram et ecce vacua erat et nihili et caelos et non erat lux in eis
vul@Jeremiah:4:24 @ vidi montes et ecce movebantur et omnes colles conturbati sunt
vul@Jeremiah:4:25 @ intuitus sum et non erat homo et omne volatile caeli recessit
vul@Jeremiah:4:26 @ aspexi et ecce Carmelus desertus et omnes urbes eius destructae sunt a facie Domini et a facie irae furoris eius
vul@Jeremiah:4:27 @ haec enim dicit Dominus deserta erit omnis terra sed tamen consummationem non faciam
vul@Jeremiah:4:28 @ lugebit terra et maerebunt caeli desuper eo quod locutus sum cogitavi et non paenituit me nec aversus sum ab eo
vul@Jeremiah:4:29 @ a voce equitis et mittentis sagittam fugit omnis civitas ingressi sunt ardua et ascenderunt rupes universae urbes derelictae sunt et non habitat in eis homo
vul@Jeremiah:4:30 @ tu autem vastata quid facies cum vestieris te coccino cum ornata fueris monili aureo et pinxeris stibio oculos tuos frustra conponeris contempserunt te amatores tui animam tuam quaerent
vul@Jeremiah:4:31 @ vocem enim quasi parturientis audivi angustias ut puerperae vox filiae Sion intermorientis expandentisque manus suas vae mihi quia defecit anima mea propter interfectos