sf_luther_1545_letzte_hand_rev2
@Jeremiah:8:4 @ DARumb sprich zu jnen / so spricht der HERR / Wo ist jemand / so er fellet / der nicht gerne wider auffstünde? Wo ist jemand / so er jrre gehet / der nicht gerne wider zu recht keme?
sf_luther_1545_letzte_hand_rev2@Jeremiah:8:5 @ Noch wil ja dis Volck zu Jerusalem jrre gehen fur vnd fur / Sie halten so hart an dem falschen Gottesdienst / das sie sich nicht wollen abwenden lassen.
sf_luther_1545_letzte_hand_rev2@Jeremiah:8:6 @ Jch sehe vnd höre / das sie nichts rechts leren / Keiner ist / dem seine bosheit leid were / vnd spreche / Was mache ich doch? Sie lauffen alle jren Lauff / wie ein grimmiger Hengst im streit.
sf_luther_1545_letzte_hand_rev2@Jeremiah:8:7 @ EJn Storck vnter dem Himel weis seine zeit / ein Dorteltaube / Kranich vnd Schwalbe mercken jre zeit / wenn sie widerkomen sollen / Aber mein Volck wil das Recht des HERRN nicht wissen.
sf_luther_1545_letzte_hand_rev2@Jeremiah:8:8 @ Wie müget jr doch sagen / Wir wissen das Recht ist / vnd haben die heilige Schrifft fur vns / Jsts doch eitel Lügen / was die Schrifftgelerten setzen.
sf_luther_1545_letzte_hand_rev2@Jeremiah:8:9 @ Darumb müssen solche Lerer zu schanden / erschreckt vnd gefangen werden / Denn was können sie guts leren / weil sie des HERRN wort verwerffen?
sf_luther_1545_letzte_hand_rev2@Jeremiah:8:10 @ DARumb so wil ich jre Weiber den Frembden geben / vnd jre ecker denen / so sie veriagen werden / Denn sie geitzen alle sampt / beide klein vnd gros / vnd beide Priester vnd Propheten leren falschen Gottesdienst.
sf_luther_1545_letzte_hand_rev2@Jeremiah:8:11 @ Vnd trösten mein Volck in jrem Vnglück / das sie es gering achten sollen / vnd sagen / Friede / friede / Vnd ist doch nicht friede.
sf_luther_1545_letzte_hand_rev2@Jeremiah:8:12 @ Darumb werden sie mit schanden bestehen / das sie solche Grewel treiben. Wiewol sie wollen vngeschendet sein / vnd wollen sich nicht schemen / Darumb müssen sie fallen vber einen hauffen / Vnd wenn ich sie heimsuchen werde / sollen sie fallen / spricht der HERR. Jesa. 56; Jere. 6.
sf_luther_1545_letzte_hand_rev2@Jeremiah:8:13 @ JCH wil sie alle ablesen spricht der HERR / Das keine drauben am Weinstock / vnd keine feigen am Feigenbawm bleiben / ja auch die Bletter weg fallen sollen / Vnd was ich jnen gegeben habe / das sol jnen genomen werden.
sf_luther_1545_letzte_hand_rev2@Jeremiah:8:14 @ Wo werden wir denn wonen? Ja samlet euch denn / vnd last vns in die feste Stedte ziehen / vnd daselbs auff hülffe harren / Denn der HERR vnser Gott / wird vns helffen mit einem bittern Trunck(note:)Er wird vns zum vnglück vnd jamer helffen / wie jr meinet / zum glück. (:note) / das wir so sündigen wider den HERRN.
sf_luther_1545_letzte_hand_rev2@Jeremiah:8:15 @ Ja verlasset euch drauff / Es solle kein not haben / So doch nichts guts furhanden ist / Vnd das jr sollet heil werden / So doch eitel schade furhanden ist. Jere. 14.
sf_luther_1545_letzte_hand_rev2@Jeremiah:8:16 @ MAn höret / das jre Rosse bereit schnauben zu Dan / vnd jre Geule schreien das das gantze Land dauon erbebet / Vnd sie faren daher / vnd werden das Land aufffressen mit allem das drinnen ist / die Stad sampt allen die drinnen wonen.
sf_luther_1545_letzte_hand_rev2@Jeremiah:8:17 @ Denn sihe / Jch wil Schlangen vnd Basilisken vnter euch senden / die nicht beschworen sind / die sollen euch stechen / spricht der HERR /
sf_luther_1545_letzte_hand_rev2@Jeremiah:8:18 @ Da wil ich mich meiner mühe vnd meines hertzenleides ergetzen.
sf_luther_1545_letzte_hand_rev2@Jeremiah:8:19 @ SJhe die tochter meins Volcks wird schreien / aus fernem Lande her / Wil denn der HERR nicht mehr Gott sein zu Zion? Oder sol sie keinen König mehr haben? Ja warumb haben sie Mich so erzürnet / durch jre Bilder vnd frembde vnnütze Gottesdienste.
sf_luther_1545_letzte_hand_rev2@Jeremiah:8:20 @ Die Erndte ist vergangen / der Sommer ist dahin / vnd vns ist keine hülffe komen.
sf_luther_1545_letzte_hand_rev2@Jeremiah:8:21 @ Mich jamert hertzlich / das mein Volck so verderbet ist / Jch greme mich vnd gehabe mich vbel.
sf_luther_1545_letzte_hand_rev2@Jeremiah:8:22 @ Jst denn keine Salbe in Gilead? oder ist kein Artzt nicht da? Warumb ist denn die Tochter meines Volcks nicht geheilet?
sf_luther_1545_letzte_hand_rev2@Jeremiah:8:23 @ AH das ich wasser gnug hette in meinem Heubte / vnd meine augen Threnequelle weren / Das ich tage vnd nacht beweinen möcht / die Erschlagenen in meinem Volck.
sf_luther_1545_letzte_hand_rev2@Jeremiah:9:1 @ Ah / das ich eine Herberge hette in der wüsten / So wolt ich mein Volck verlassen vnd von jnen ziehen / Denn es sind eitel Ehebrecher vnd ein vrecher Hauffe.
sf_luther_1545_letzte_hand_rev2@Jeremiah:9:2 @ Sie schiessen mit jren Zungen eitel lügen vnd keine warheit / vnd treibens mit gewalt im Lande / vnd gehen von einer bosheit zur andern / vnd achten mich nicht / spricht der HERR.
sf_luther_1545_letzte_hand_rev2@Jeremiah:9:3 @ EJn jglicher hüte sich fur seinem Freunde / vnd trawe auch seinem Bruder nicht / Denn ein Bruder vnterdrückt den andern / vnd ein Freund verrhet den andern /
sf_luther_1545_letzte_hand_rev2@Jeremiah:9:4 @ Ein Freund teusscht den andern / vnd reden kein war wort. Sie vleissigen sich drauff / wie einer den andern betriege / vnd ist jnen leid / das sie es nicht erger machen können /
sf_luther_1545_letzte_hand_rev2@Jeremiah:9:5 @ Es ist allenthalben eitel Triegerey vnter jnen / vnd fur triegerey wollen sie Mich nicht kennen / spricht der HERR. Mich. 7.
sf_luther_1545_letzte_hand_rev2@Jeremiah:9:6 @ DArumb spricht der HERR Zebaoth also / Sihe / Jch wil sie schmeltzen vnd prüfen / Denn was sol ich sonst thun / weil sich mein Volck so zieret?
sf_luther_1545_letzte_hand_rev2@Jeremiah:9:7 @ Jr falschen Zungen sind mördliche pfeile / Mit jrem munde reden sie freundlich gegen dem Nehesten / Aber im hertzen lauren sie auff den selben.
sf_luther_1545_letzte_hand_rev2@Jeremiah:9:8 @ Solt ich nu solchs nicht heimsuchen an jnen / spricht der HERR / vnd meine Seele solt sich nicht rechen an solchem Volck / als dis ist? Psal. 28.
sf_luther_1545_letzte_hand_rev2@Jeremiah:9:9 @ JCh mus auff den Bergen weinen vnd heulen / vnd bey den Hürten in der wüsten klagen / Denn sie sind so gar verheeret / das niemand da wandelt / vnd man auch nicht ein Vieh schreien höret / Es ist beide vogel des Himels / vnd das Vieh alles weg.
sf_luther_1545_letzte_hand_rev2@Jeremiah:9:10 @ Vnd ich wil Jerusalem zum Steinhauffen vnd zur Trachenwonung machen / vnd wil die stedte Juda wüste machen / das niemand drinnen wonen sol.
sf_luther_1545_letzte_hand_rev2@Jeremiah:9:11 @ Wer nu weise were / vnd lies jm zu hertzen gehen / vnd verkündigete was des HERRN Mund zu jm sagt / Warumb das Land verderbet vnd verheeret wird / wie eine Wüsten / da niemand wandelt. Psal. 78; Mich. 3.
sf_luther_1545_letzte_hand_rev2@Jeremiah:9:12 @ VND der HERR sprach / Darumb das sie mein Gesetz verlassen / das ich jnen furgegeben habe / vnd gehorchen meiner Rede nicht / leben auch nicht darnach /
sf_luther_1545_letzte_hand_rev2@Jeremiah:9:13 @ Sondern folgen jres hertzen geduncken vnd Baalim / wie sie jre Veter gelert haben.
sf_luther_1545_letzte_hand_rev2@Jeremiah:9:14 @ Darumb spricht der HERR Zebaoth / der Gott Jsrael also / Sihe / Jch wil dis Volck mit Wermut speisen vnd mit Gallen trencken.
sf_luther_1545_letzte_hand_rev2@Jeremiah:9:15 @ Jch wil sie vnter die Heiden zurstrewen / welche weder sie noch jre Veter kennen / vnd wil das Schwert hinder sie schicken / bis das aus mit jnen sey.
sf_luther_1545_letzte_hand_rev2@Jeremiah:9:16 @ SO spricht der HERR Zebaoth / Schaffet vnd bestellet Klageweiber / das sie komen / vnd schickt nach den die es wol können /
sf_luther_1545_letzte_hand_rev2@Jeremiah:9:17 @ vnd eilend vns klagen / Das vnser augen mit Threnen rinnen / vnd vnser augenlider mit wasser fliessen /
sf_luther_1545_letzte_hand_rev2@Jeremiah:9:18 @ Das man ein kleglich geschrey höre zu Zion / nemlich also / Ah / wie sind wir so gar verstöret vnd zu schanden worden? Wir müssen das Land reumen / Denn sie haben vnser wonunge geschleifft.
sf_luther_1545_letzte_hand_rev2@Jeremiah:9:19 @ So höret nu jr Weiber des HERRN wort / vnd nemet zu ohren seines mundes rede / Leret ewer Töchter weinen / vnd eine lere die andere klagen / nemlich also /
sf_luther_1545_letzte_hand_rev2@Jeremiah:9:20 @ Der Tod ist zu vnsern Fenstern herein gefallen / vnd in vnser Pallast komen / die Kinder zu würgen auff der gassen / vnd die Jünglinge auff der strassen.
sf_luther_1545_letzte_hand_rev2@Jeremiah:9:21 @ So spricht der HERR / Sage / der menschen Leichnam sollen ligen / wie der Mist auff dem felde / vnd wie garben hinder dem Schnitter / die niemand samlet.
sf_luther_1545_letzte_hand_rev2@Jeremiah:9:22 @ SO spricht der HERR / Ein Weiser rhüme sich nicht seiner weisheit / Ein Starcker rhüme sich nicht seiner stercke / Ein Reicher rhüme sich nicht seines reichthumbs.
sf_luther_1545_letzte_hand_rev2@Jeremiah:9:23 @ Sondern / wer sich rhümen wil / der rhüme sich des / Das er mich wisse vnd kenne / das ich der HERR bin / der barmhertzigkeit / recht vnd gerechtigkeit vbet auff Erden / Denn solchs gefellet mir / spricht der HERR.
sf_luther_1545_letzte_hand_rev2@Jeremiah:9:24 @ SJhe / Es kompt die zeit / spricht der HERR / das ich heimsuchen werde alle(note:)Alle vber einen Hauffen / Jüden vnd Heiden / Einer ist so frum als der ander. Die Jüden sind wol so böse als die Heiden / nach dem hertzen / ob sie gleich leiblich beschnitten sind. (:note) / die Beschnitten mit den Vnbeschnitten / nemlich /
sf_luther_1545_letzte_hand_rev2@Jeremiah:9:25 @ Egypten / Juda / Edom / die kinder Ammon / Moab / vnd alle die in den Ortern der wüsten wonen. Denn alle Heiden haben vnbeschnitten Vorhaut / Aber das gantze haus Jsrael hat vnbeschnitten hertz.
sf_luther_1545_letzte_hand_rev2@Jeremiah:10:1 @ HOret / was der HERR zu euch vom hause Jsrael redet.
sf_luther_1545_letzte_hand_rev2@Jeremiah:10:2 @ So spricht der HERR / Jr solt nicht der Heiden Weise lernen / vnd solt euch nicht fürchten fur den Zeichen des Himels / wie die Heiden sich furchten /
sf_luther_1545_letzte_hand_rev2@Jeremiah:10:3 @ Denn der Heiden Götter sind lauter nichts. Sie hawen im walde einen Bawm / vnd der Werckmeister macht sie mit dem Beil /
sf_luther_1545_letzte_hand_rev2@Jeremiah:10:4 @ vnd schmückt sie mit Silber vnd Gold / vnd hefftet sie mit Negeln vnd Hemmern / das sie nicht vmbfallen.
sf_luther_1545_letzte_hand_rev2@Jeremiah:10:5 @ Es sind ja nichts / denn Seulen vberzogen / Sie können nicht reden / So mus man sie auch tragen / denn sie können nicht gehen. Darumb solt jr euch nicht fur jnen fürchten / Denn sie können weder helffen noch schaden thun.
sf_luther_1545_letzte_hand_rev2@Jeremiah:10:6 @ ABer dir HERR ist niemand gleich / Du bist gros / vnd dein Name ist gros vnd kansts mit der That beweisen.
sf_luther_1545_letzte_hand_rev2@Jeremiah:10:7 @ Wer solt dich nicht fürchten / du König der Heiden? Dir solt man ja gehorchen. Denn es ist vnter allen Weisen der Heiden / vnd in allen Königreichen dein gleiche nicht.
sf_luther_1545_letzte_hand_rev2@Jeremiah:10:8 @ Sie sind all zumal Narren vnd Thoren / Denn ein Holtz mus ja ein nichtiger Gottesdienst sein /
sf_luther_1545_letzte_hand_rev2@Jeremiah:10:9 @ Silbern blech bringet man auff dem Meer her / gold aus Vphas / durch den Meister vnd Goldschmid zugericht / gele Seiden vnd Purpur zeucht man jm an / Vnd ist alles der Weisen werck.
sf_luther_1545_letzte_hand_rev2@Jeremiah:10:10 @ ABer der HERR ist ein rechter Gott / ein lebendiger Gott / ein ewiger König. Fur seinem zorn bebet die Erde / vnd die Heiden können sein drewen nicht ertragen.
sf_luther_1545_letzte_hand_rev2@Jeremiah:10:11 @ So sprecht nu zu jnen also / Die Götter / so den Himel vnd Erden nicht gemacht haben / müssen vertilget werden von der Erden / vnd vnter dem Himel.
sf_luther_1545_letzte_hand_rev2@Jeremiah:10:12 @ Er aber hat die Erden durch seine Krafft gemacht / vnd der Weltkreis bereitet / durch seine Weisheit / vnd den Himel ausgebreitet / durch seinen Verstand.
sf_luther_1545_letzte_hand_rev2@Jeremiah:10:13 @ Wenn er donnert / so ist des Wassers die menge vnter dem Himel / vnd zeucht die nebel auff / vom ende der erden / Er macht die Blitzen im Regen / vnd lesst den Wind komen / aus heimlichen orten.
sf_luther_1545_letzte_hand_rev2@Jeremiah:10:14 @ ALle Menschen sind Narren mit jrer kunst / vnd alle Goldschmit stehen mit schanden mit jren Bilden / Denn jre Götzen sind Triegerey / vnd haben kein Leben.
sf_luther_1545_letzte_hand_rev2@Jeremiah:10:15 @ ES ist eitel nichts vnd ein verfürisch werck / Sie müssen vmbkomen / wenn sie heim gesucht werden.
sf_luther_1545_letzte_hand_rev2@Jeremiah:10:16 @ ABer also ist der nicht / der Jacobs schatz ist / Sondern er ists / der alles geschaffen hat / vnd Jsrael ist sein Erbteil / Er heisst HERR Zebaoth.
sf_luther_1545_letzte_hand_rev2@Jeremiah:10:17 @ THu dein Gewerbe weg aus dem Lande / die du wonest in der festen (stad)
sf_luther_1545_letzte_hand_rev2@Jeremiah:10:18 @ Denn so spricht der HERR / Sihe / Jch wil die Einwoner des Landes / auff dis mal verschleudern / vnd wil sie engsten / das sie es fülen sollen.
sf_luther_1545_letzte_hand_rev2@Jeremiah:10:19 @ AH meines jamers vnd hertzenleids / Jch dencke aber / Es ist mein Plage / ich mus sie leiden.
sf_luther_1545_letzte_hand_rev2@Jeremiah:10:20 @ Meine Hütten ist zerstöret / vnd alle meine seile sind zurissen / Meine Kinder sind weg / vnd nicht mehr furhanden. Niemand richtet meine Hütte wider auff / vnd meine Gezelt schlegt niemand wider auff.
sf_luther_1545_letzte_hand_rev2@Jeremiah:10:21 @ Denn die Hirten sind zu Narren worden / vnd fragen nach dem HERRN nicht / Darumb können sie auch nichts rechts leren / sondern alle Herde sind zerstrewet.
sf_luther_1545_letzte_hand_rev2@Jeremiah:10:22 @ Sihe / Es kompt ein geschrey daher / vnd ein gros beben aus dem Lande von Mitternacht / Das die stedte Juda verwüstet / vnd zu Drachen wonung werden sollen.
sf_luther_1545_letzte_hand_rev2@Jeremiah:10:23 @ JCH weis HERR / das des Menschen thun stehet nicht in seiner gewalt / vnd stehet in niemands macht / wie er wandele oder seinen gang richte.
sf_luther_1545_letzte_hand_rev2@Jeremiah:10:24 @ Züchtige mich HERR / Doch mit masse / vnd nicht in deinem grim / Auff das du mich nicht auffreibest.
sf_luther_1545_letzte_hand_rev2@Jeremiah:10:25 @ Schütte aber deinen zorn vber die Heiden / so dich nicht kennen / Vnd vber die Geschlecht / so deinen Namen nicht anruffen. Denn sie haben Jacob auffgefressen vnd verschlungen / sie haben jn auffgereumet / vnd seine Wonung verwüstet. Psal. 79.
sf_luther_1545_letzte_hand_rev2@Jeremiah:11:1 @ DJs ist das wort / das zu Jeremia geschach vom HERRN / vnd sprach /
sf_luther_1545_letzte_hand_rev2@Jeremiah:11:2 @ Höret die wort dieses Bunds / das jr sie denen in Juda / vnd den bürgern zu Jerusalem sagt /
sf_luther_1545_letzte_hand_rev2@Jeremiah:11:3 @ vnd sprich zu jnen / so spricht der HERR / der Gott Jsrael. Verflucht sey / wer nicht gehorchet den worten dieses Bundes /
sf_luther_1545_letzte_hand_rev2@Jeremiah:11:4 @ (den ich ewern Vetern gebot / des tages / da ich sie aus Egyptenland füret / aus dem eisern Ofen / vnd sprach / Gehorchet meiner stim / vnd thut wie ich euch geboten habe / So solt jr mein volck sein / vnd ich wil ewer Gott sein /
sf_luther_1545_letzte_hand_rev2@Jeremiah:11:5 @ Auff das ich den Eid halten müge / den ich ewren Vetern geschworen habe / jnen zu geben ein Land / darin milch vnd honig fleusst / wie es denn heuts tages stehet. Jch antwortet vnd sprach / HERR / Ja / es sey also(note:)Jn Ebreo / Amen.(:note). Deuteronomy. 27; Galatians. 3; Genesis. 15; Gen. 26; Gen. 28.
sf_luther_1545_letzte_hand_rev2@Jeremiah:11:6 @ VND der HERR sprach zu mir / Predige alle diese wort in den stedten Juda / vnd auff den gassen zu Jerusalem / vnd sprich / Höret die wort dieses Bundes / vnd thut darnach.
sf_luther_1545_letzte_hand_rev2@Jeremiah:11:7 @ Denn ich habe ewr Veter bezeuget von dem tage an / da ich sie aus Egyptenland füret / bis auff den heutigen tag / vnd zeugete früe / vnd sprach / Gehorchet meiner stim.
sf_luther_1545_letzte_hand_rev2@Jeremiah:11:8 @ Aber sie gehorchten nicht / neigten auch jre ohren nicht / Sondern ein jglicher gieng nach seines bösen hertzen geduncken. Darumb wil ich auch vber sie gehen lassen / alle wort dieses Bundes / den ich geboten habe zu thun / Vnd sie doch nicht darnach gethan haben.
sf_luther_1545_letzte_hand_rev2@Jeremiah:11:9 @ VND der HERR sprach zu mir / Jch weis wol / wie sie in Juda vnd zu Jerusalem sich rotten.
sf_luther_1545_letzte_hand_rev2@Jeremiah:11:10 @ Sie keren sich eben zu den sünden jrer vorigen Veter / welche auch nicht gehorchen wolten meinen worten / vnd folgeten auch andern Göttern nach / vnd dienten jnen / Also hat das haus Jsrael vnd das haus Juda (jmerdar) meinen Bund gebrochen / den ich mit jren Vetern gemacht habe.
sf_luther_1545_letzte_hand_rev2@Jeremiah:11:11 @ Darumb / Sihe / spricht der HERR / Jch wil ein Vnglück vber sie gehen lassen / dem sie nicht sollen entgehen mügen / Vnd wenn sie zu mir schreien / wil ich Sie nicht hören.
sf_luther_1545_letzte_hand_rev2@Jeremiah:11:12 @ SO las denn die stedte Juda vnd die bürger zu Jerusalem hin gehen / vnd zu den Göttern schreien / den sie gereuchert haben / Aber sie werden jnen nicht helffen in jrer not.
sf_luther_1545_letzte_hand_rev2@Jeremiah:11:13 @ Denn so manche Stad / so manche Götter hastu Juda / Vnd so manche gassen zu Jerusalem sind / so manchen schanden Altar habt jr auffgericht / dem Baal zu reuchern.
sf_luther_1545_letzte_hand_rev2@Jeremiah:11:14 @ So bitte du nu nicht fur dis Volck / vnd thu kein flehen noch gebet fur sie / Denn ich wil sie nicht hören / wenn sie zu mir schreien in jrer not. Deuteronomy. 32; Jere. 2.
sf_luther_1545_letzte_hand_rev2@Jeremiah:11:15 @ WAs haben meine Freunde(note:)Gleich wie die Mutter im zorn / jr sönlin / Juncker heisst / So heisst er sie auch seine Freunde / die fromen Kindlin / die alle Büberey treiben vnd Abgötterey / Vnd sol doch wolgethan sein. (:note)in meinem Hause zu schaffen? Sie treiben alle schalckheit / vnd meinen / das heilige Fleisch sol es von jnen nemen / Vnd wenn sie vbel thun sind sie guter ding drüber.
sf_luther_1545_letzte_hand_rev2@Jeremiah:11:16 @ Der HERR nennete dich einen grünen / schönen / fruchtbarn Olebawm / Aber nu hat er mit einem grossen Mordgeschrey / ein Fewr(note:)Den König zu Babel. (:note)vmb den selbigen angezündet / das seine este verderben müssen
sf_luther_1545_letzte_hand_rev2@Jeremiah:11:17 @ Denn der HERR Zebaoth / der dich gepflantzt hat / hat dir ein Vnglück gedrewet / vmb der bosheit willen des hauses Jsrael vnd des hauses Juda / welche sie treiben / das sie mich erzürnen / mit jrem reuchern / das sie dem Baal thun.
sf_luther_1545_letzte_hand_rev2@Jeremiah:11:18 @ DEr HERR hat mirs offenbart / das ichs weis / vnd zeigt mir jr furnemen /
sf_luther_1545_letzte_hand_rev2@Jeremiah:11:19 @ nemlich / Das sie mich / wie ein arm Schaf / zur schlachtbanck füren wollen / Denn ich wuste nicht / das sie wider mich beratschlagt hatten / vnd gesagt / Lasst vns den Bawm mit seinen früchten verderben / vnd jn aus dem Lande der Lebendigen ausrotten / das seines namens nimer mehr gedacht werde.
sf_luther_1545_letzte_hand_rev2@Jeremiah:11:20 @ Aber du HERR Zebaoth / du gerechter Richter / der du nieren vnd hertzen prüfest / Las mich deine rache vber sie sehen / Denn ich hab dir meine Sache befolhen. Psal. 7.
sf_luther_1545_letzte_hand_rev2@Jeremiah:11:21 @ DARumb spricht der HERR also / wider die Menner zu Anathoth / die dir nach deinem Leben stehen / vnd sprechen / Weissage vns nicht im Namen des HERRN / wiltu anders nicht von vnsern Henden sterben.
sf_luther_1545_letzte_hand_rev2@Jeremiah:11:22 @ Darumb spricht der HERR Zebaoth also / Sihe / Jch wil sie heimsuchen / jr junge Manschafft sollen mit dem Schwert getödtet werden / vnd jre Söne vnd Töchter hungers sterben / das nichts von jnen vberbleibe /
sf_luther_1545_letzte_hand_rev2@Jeremiah:11:23 @ Denn ich wil vber die Menner zu Anathoth vnglück gehen lassen / des jares / wenn sie heimgesucht werden sollen.
sf_luther_1545_letzte_hand_rev2@Jeremiah:12:1 @ HERR / wenn ich gleich mit dir rechten wolt / so beheltestu doch recht / Dennoch mus ich vom Recht mit dir reden. Warumb gehets doch den Gottlosen so wol / vnd die Verechter haben alles die fülle?
sf_luther_1545_letzte_hand_rev2@Jeremiah:12:2 @ Du pflantzest sie das sie wurtzeln vnd wachsen / vnd bringen frucht / Du lessest sie viel von dir rhümen / vnd züchtigest sie nicht.
sf_luther_1545_letzte_hand_rev2@Jeremiah:12:3 @ Mich aber HERR kennestu / vnd sihest mich / vnd prüfest mein Hertz fur dir / Aber du lessest sie frey gehen / wie Schafe / Das sie geschlacht werden vnd sparest(note:)Ebre. Heiligest oder bereitest sie. (:note)sie / das sie gewürget werden. Hiob. 21; Psal. 73; Habakkuk. 3.
sf_luther_1545_letzte_hand_rev2@Jeremiah:12:4 @ WJe lange sol doch das Land so jemerlich stehen / vnd das Gras auff dem felde allenthalben verdorren / vmb der Einwoner bosheit willen / das beide Vieh vnd Vogel nimer da sin? Denn sie sprechen / Ja er weis viel / wie es vns gehen wird.
sf_luther_1545_letzte_hand_rev2@Jeremiah:12:5 @ Wenn dich die müde(note:)Lieber Jeremia furchtestu dich zu Anathoth / Was wils zu Jerusalem werden / da die hoffertigen Tyrannen wider dich sein werden? Fürchte dich nicht so etc. (:note)machen / die zu Fusse gehen / Wie wil dirs gehen / wenn du mit den Reutern lauffen solt? Vnd so du im Lande / da es friede ist / sicherheit suchest / Was wil mit dir werden / bey dem hoffertigen Jordan?
sf_luther_1545_letzte_hand_rev2@Jeremiah:12:6 @ Denn es verachten dich auch deine Brüder vnd deines Vaters haus / vnd schreien zeter vber dich / Darumb vertraw du jnen nicht / wenn sie gleich freundlich mit dir reden.
sf_luther_1545_letzte_hand_rev2@Jeremiah:12:7 @ DArumb hab ich mein Haus verlassen müssen / vnd mein Erbe meiden / vnd meine liebe Seele in der Feinde hand geben.
sf_luther_1545_letzte_hand_rev2@Jeremiah:12:8 @ Mein Erbe ist mir worden / wie ein Lewe im walde / vnd brüllet wider mich / Darumb bin ich jm gram worden.
sf_luther_1545_letzte_hand_rev2@Jeremiah:12:9 @ Mein Erbe ist wie der sprincklicht Vogel / vmb welchen sich die Vogel samlen / Wolauff / vnd samlet euch alle Feldthier / komet vnd fresset.
sf_luther_1545_letzte_hand_rev2@Jeremiah:12:10 @ ES haben Hirten / vnd der viel / meinen Weinberg verderbet / vnd meinen Acker zertretten / Sie haben meinen schönen acker zur wüsten gemacht / sie habens öde gemacht.
sf_luther_1545_letzte_hand_rev2@Jeremiah:12:11 @ Jch sehe bereit / wie es so jemerlich verwüstet ist / Ja das gantze Land ist wüste / Aber es wil niemand zu hertzen nemen.
sf_luther_1545_letzte_hand_rev2@Jeremiah:12:12 @ Denn die Verstörer faren daher / vber alle Hügeln der wüsten / vnd das fressend Schwert des HERRN von einem ende des Landes bis zum andern / vnd kein fleisch Frieden haben wird.
sf_luther_1545_letzte_hand_rev2@Jeremiah:12:13 @ Sie seen weitzen / Aber disteln werden sie erndten / vnd was sie gewinnen / kompt jnen nicht zum nutz / Sie werden jres Einkomens nicht fro werden / fur dem grimmigen zorn des HERRN.
sf_luther_1545_letzte_hand_rev2@Jeremiah:12:14 @ SO spricht der HERR / wider alle meine böse Nachbarn / so das Erbteil antasten / das ich meinem volck Jsrael ausgeteilet habe / Sihe / Jch wil sie aus jrem Lande ausreissen / vnd das haus Juda / aus jrem mittel reissen.
sf_luther_1545_letzte_hand_rev2@Jeremiah:12:15 @ Vnd wenn ich sie nu ausgerissen habe / wil ich mich widerumb vber sie erbarmen / vnd wil einen jglichen zu seinem Erbteil vnd in sein Land wider bringen.
sf_luther_1545_letzte_hand_rev2@Jeremiah:12:16 @ Vnd sol geschehen / wo sie von meinem Volck lernen werden / das sie schweren bey meinem Namen (so war der HERR lebt) Wie sie (zuuor) mein Volck geleret haben schweren / bey Baal / So sollen sie vnter meinem Volck erbawet werden.
sf_luther_1545_letzte_hand_rev2@Jeremiah:12:17 @ Wo sie aber nicht hören wöllen / So wil ich solchs Volck ausreissen vnd vmbbringen / spricht der HERR. Deuteronomy. 4; Deut. 30.
sf_luther_1545_letzte_hand_rev2@Jeremiah:13:1 @ SO spricht der HERR zu mir / Gehe hin / vnd keuff dir einen leinen Gürtel / vnd gürte damit deine Lenden / vnd mache jn nicht nass.
sf_luther_1545_letzte_hand_rev2@Jeremiah:13:2 @ Vnd ich kaufft einen Gürtel / nach dem befelh des HERRN / vnd gürtet jn vmb meine Lenden.
sf_luther_1545_letzte_hand_rev2@Jeremiah:13:3 @ Da geschach des HERRN wort zum andern mal zu mir / vnd sprach /
sf_luther_1545_letzte_hand_rev2@Jeremiah:13:4 @ Nim den Gürtel den du gekaufft / vnd vmb deine Lenden gegürtet hast / vnd mache dich auff / vnd gehe hin an den Phrath / vnd verstecke jn daselbs / in einen Steinritz.
sf_luther_1545_letzte_hand_rev2@Jeremiah:13:5 @ Jch gieng hin vnd verstecket jn am Phrath / wie mir der HERR geboten hatte.
sf_luther_1545_letzte_hand_rev2@Jeremiah:13:6 @ Nach langer zeit aber / sprach der HERR zu mir / Mache dich auff / vnd gehe hin an den Phrath / vnd hole den Gürtel wider / den ich dich hies daselbs verstecken.
sf_luther_1545_letzte_hand_rev2@Jeremiah:13:7 @ Jch gieng hin an den Phrath / vnd grub auff / vnd nam den Gürtel von dem ort / dahin ich jn versteckt hatte / Vnd sihe / der Gürtel war verdorben / das er nichts mehr tuchte.
sf_luther_1545_letzte_hand_rev2@Jeremiah:13:8 @ DA geschach des HERRN wort zu mir / vnd sprach /
sf_luther_1545_letzte_hand_rev2@Jeremiah:13:9 @ so spricht der HERR / Eben also wil ich auch verderben die grosse hoffart Juda vnd Jerusalem /
sf_luther_1545_letzte_hand_rev2@Jeremiah:13:10 @ das böse Volck / das meine wort nicht hören wil / Sondern gehen hin nach geduncken / jres hertzen / vnd folgen andern Göttern / das sie denselbigen dienen vnd anbeten / Sie sollen werden / wie der Gürtel / der nichts mehr taug.
sf_luther_1545_letzte_hand_rev2@Jeremiah:13:11 @ Denn gleich wie ein Man den gürtel vmb seine Lenden bindet / Also hab ich / spricht der HERR / das gantze haus Jsrael vnd das gantze haus Juda / vmb mich gegürtet / das sie mein Volck sein solten / zu eim namen / lob vnd ehren / Aber sie wollen nicht hören.
sf_luther_1545_letzte_hand_rev2@Jeremiah:13:12 @ SO sage jnen nu dis wort / so spricht der HERR / der Gott Jsrael / Es sollen alle legel mit Wein gefüllet werden. So werden sie zu dir sagen / Wer weis das nicht? das man alle legel mit wein füllen sol?
sf_luther_1545_letzte_hand_rev2@Jeremiah:13:13 @ So sprich zu jnen / so spricht der HERR / Sihe / Jch wil alle die in diesem Lande wonen / die Könige / so auff dem stuel Dauids sitzen / die Priester vnd Propheten / vnd alle Einwoner zu Jerusalem / füllen / das sie truncken werden sollen /
sf_luther_1545_letzte_hand_rev2@Jeremiah:13:14 @ Vnd wil einen mit dem andern / die Veter sampt den Kindern / verstrewen / spricht der HERR / vnd wil weder schonen / noch vbersehen / noch barmhertzig sein / vber jrem verderben.
sf_luther_1545_letzte_hand_rev2@Jeremiah:13:15 @ SO höret nu vnd merckt auff / vnd trotzt nicht / Denn der HERR hats geredt.
sf_luther_1545_letzte_hand_rev2@Jeremiah:13:16 @ Gebt dem HERRN ewrem Gott die Ehre / ehe denn es finster werde / vnd ehe ewre füsse sich an den tunckeln Bergen(note:)Das ist / Jr verlassest euch auff Egypten / vnd hoffet des Liechts vnd Glücks an solchen Bergen. Aber sie werden euch im tunckel vnd vnglück lassen / vnd ewer Trost wird euch feilen. (:note)stossen / Das jr des liechts wartet / So ers doch gar finster vnd tunckel machen wird.
sf_luther_1545_letzte_hand_rev2@Jeremiah:13:17 @ Wolt jr aber solchs nicht hören / So mus meine Seele doch heimlich weinen vber solcher hoffart / Meine augen müssen mit threnen fliessen / das des HERRN Herd gefangen wird.
sf_luther_1545_letzte_hand_rev2@Jeremiah:13:18 @ SAge dem Könige vnd der Königin / Setzt euch herunter / denn die Krone der herrligkeit ist euch von ewrem Heubt gefallen.
sf_luther_1545_letzte_hand_rev2@Jeremiah:13:19 @ Die Stedte gegen mittag sind verschlossen / vnd ist niemand der sie auffthue / das gantze Juda ist rein weggefüret.
sf_luther_1545_letzte_hand_rev2@Jeremiah:13:20 @ Hebt ewer augen auff / vnd sehet / wie sie von Mitternacht daher komen. Wo ist nu die Herd / so dir befolhen war / deine herrliche herd?
sf_luther_1545_letzte_hand_rev2@Jeremiah:13:21 @ Was wiltu sagen / wenn er dich so heimsuchen wird? Denn du hast sie so gewehnet / wider dich / das sie Fürsten vnd Heubter sein wollen. Was gilts / Es wird dich angst ankomen / wie ein weib in Kindsnöten?
sf_luther_1545_letzte_hand_rev2@Jeremiah:13:22 @ Vnd wenn du in deinem hertzen sagen wilt / Warumb begegent doch mir solchs? Vmb der menge willen deiner missethat / sind dir deine seume auffgedeckt / vnd deine Schenckel (mit gewalt) geblösset. Jere. 30.
sf_luther_1545_letzte_hand_rev2@Jeremiah:13:23 @ KAn auch ein Mohr seine haut wandeln / oder ein Parder seine flecken? So könnet jr auch guts thun / weil jr des bösen gewonet seist.
sf_luther_1545_letzte_hand_rev2@Jeremiah:13:24 @ Darumb wil ich sie zurstrewen / wie stoppeln / die fur dem winde aus der wüsten verwebt werden.
sf_luther_1545_letzte_hand_rev2@Jeremiah:13:25 @ Das sol dein Lohn sein / vnd dein Teil den ich dir zugemessen habe / spricht der HERR. Darumb / das du mein vergessen hast / vnd verlessest dich auff Lügen /
sf_luther_1545_letzte_hand_rev2@Jeremiah:13:26 @ So wil auch ich deine seume hoch auffdecken gegen dir / das man deine Schlam wol sehen mus.
sf_luther_1545_letzte_hand_rev2@Jeremiah:13:27 @ Denn ich habe gesehen deine Ehebrecherey / deine Geilheit / dein vreche Hurerey / ja deine Grewel / beide auff Hügeln vnd auff Eckern. Weh dir Jerusalem / wenn wiltu doch jmer mehr gereiniget werden?
sf_luther_1545_letzte_hand_rev2@Jeremiah:14:1 @ DJs ists wort / das der HERR zu Jeremia saget / von der thewren zeit.
sf_luther_1545_letzte_hand_rev2@Jeremiah:14:2 @ Juda ligt jemerlich / jre Thore stehen elend / Es stehet kleglich auff dem Lande / vnd ist zu Jerusalem eine grosse Dürre.
sf_luther_1545_letzte_hand_rev2@Jeremiah:14:3 @ Die grossen schicken die kleinen nach wasser / Aber wenn sie zum Brun komen finden sie kein Wasser / vnd bringen jr gefesse leer wider. Sie gehen trawrig vnd betrübt / vnd verhüllen jre heubter /
sf_luther_1545_letzte_hand_rev2@Jeremiah:14:4 @ Darumb das die erde lechet / weil es nicht regenet auff die erden / Die ackerleute gehen trawrig / vnd verhüllen jre heubter.
sf_luther_1545_letzte_hand_rev2@Jeremiah:14:5 @ Denn auch die Hinden / so auff dem felde werffen / verlassen die Jungen / weil kein gras wechst.
sf_luther_1545_letzte_hand_rev2@Jeremiah:14:6 @ Das Wild stehet auff den hügeln vnd schnappet nach der lufft / wie die Drachen / vnd verschmacht / weil kein kraut wechst.
sf_luther_1545_letzte_hand_rev2@Jeremiah:14:7 @ AH HERR / Vnser missethat habens ja verdienet / Aber hilff doch vmb deines Namens willen / Denn vnser vngehorsam ist gros / damit wir wider dich gesündiget haben.
sf_luther_1545_letzte_hand_rev2@Jeremiah:14:8 @ Du bist der trost Jsrael / vnd jr Nothelffer / Warumb stellestu dich / als werestu ein Gast im Lande / vnd als ein Frembder(note:)Du stellest dich / als ein Gast / frembder / verzagter / Denn du nimpst dich vnser nicht an / vnd beweisest deine macht nicht / vns zu helffen. (:note) / der nur vber nacht drinnen bleibt?
sf_luther_1545_letzte_hand_rev2@Jeremiah:14:9 @ Warumb stellestu dich / als ein Helt der verzagt ist / vnd als ein Rise / der nicht helffen kan? Du bist doch ja vnter vns HERR / vnd wir heissen nach deinem Namen / verlas vns nicht.
sf_luther_1545_letzte_hand_rev2@Jeremiah:14:10 @ SO spricht der HERR von diesem Volck / Sie lauffen gern hin vnd wider / vnd bleiben nicht gern heim / Darumb wil jr der HERR nicht / sondern er denckt nu an jre missethat / vnd wil jre sunde heimsuchen.
sf_luther_1545_letzte_hand_rev2@Jeremiah:14:11 @ Vnd der HERR sprach zu mir / Du solt nicht fur dis Volck vmb gnade bitten /
sf_luther_1545_letzte_hand_rev2@Jeremiah:14:12 @ Denn ob sie gleich fasten / So wil ich doch jr flehen nicht hören / Vnd ob sie Brandopffer vnd Speisopffer bringen / So gefallen sie mir doch nicht / Sondern ich wil sie mit dem Schwert / Hunger vnd Pestilentz auffreiben. Jere. 7.
sf_luther_1545_letzte_hand_rev2@Jeremiah:14:13 @ DA sprach ich / Ah HErr HERR / Sihe / Die Propheten sagen jnen / Jr werdet kein Schwert sehen / vnd keine Theurung bey euch haben / Sondern ich wil euch guten Fried geben an diesem ort.
sf_luther_1545_letzte_hand_rev2@Jeremiah:14:14 @ Vnd der HERR sprach zu mir / Die Propheten weissagen falsch in meinem Namen / Jch hab sie nicht gesand / vnd jnen nichts befolhen / vnd nichts mit jnen geredt / Sie Predigen euch falsche Gesichte / deutunge / Abgötterey / vnd jres hertzen triegerey. Jere. 23; Jere. 27; Jere. 29.
sf_luther_1545_letzte_hand_rev2@Jeremiah:14:15 @ DARumb so spricht der HERR / von den Propheten / die in meinem Namen weissagen / so ich sie doch nicht gesand habe / Vnd sie dennoch predigen / es werde kein Schwert noch Theurung in dis Land komen / Solche Propheten sollen sterben durch Schwert vnd Hunger.
sf_luther_1545_letzte_hand_rev2@Jeremiah:14:16 @ Vnd das Volck dem sie weissagen / sollen vom Schwert vnd Hunger auff den gassen zu Jerusalem hin vnd her ligen / das sie niemand begraben wird / Also auch / jre Weiber / Söne vnd Töchter / vnd wil jre bosheit vber sie schütten.
sf_luther_1545_letzte_hand_rev2@Jeremiah:14:17 @ VND du solt zu jnen sagen dis wort / Meine augen fliessen mit threnen tag vnd nacht / vnd hören nicht auff / Denn die Jungfraw die tochter meins Volcks / ist grewlich zuplagt vnd jemerlich geschlagen.
sf_luther_1545_letzte_hand_rev2@Jeremiah:14:18 @ Gehe ich hinaus auffs feld / Sihe / so ligen da Erschlagene mit dem Schwert / Kom ich in die stad / So ligen da fur Hunger verschmacht / Denn es müssen auch die Propheten / dazu auch die Priester / in ein Land zihen / das sie nicht kennen.
sf_luther_1545_letzte_hand_rev2@Jeremiah:14:19 @ HAstu denn Juda verworffen? Oder hat deine Seele ein ekel an Zion? Warumb hastu denn vns so geschlagen / das vns niemand heilen kan? Wir hoffeten / Es solt friede werden / So kompt nichts guts / Wir hoffeten / wir solten heil werden / Aber sihe / so ist mehr schadens da.
sf_luther_1545_letzte_hand_rev2@Jeremiah:14:20 @ HERR / wir erkennen vnser Gottlos wesen / vnd vnser Veter missethat / Denn wir haben wider Dich gesündiget.
sf_luther_1545_letzte_hand_rev2@Jeremiah:14:21 @ Aber vmb deines Namens willen / las vns nicht geschendet werden / Las den Thron deiner Herrligkeit nicht verspottet werden / Gedenck doch / vnd las deinen Bund mit vns / nicht auffhören.
sf_luther_1545_letzte_hand_rev2@Jeremiah:14:22 @ Es ist doch ja vnter der Heiden Götzen keiner / der Regen künd geben / So kan der Himel auch nicht regen / Du bist doch ja der HERR vnser Gott / auff den wir hoffen / Denn du kanst solchs alles thun.
sf_luther_1545_letzte_hand_rev2@Jeremiah:15:1 @ VND der HERR sprach zu mir / Vnd wenn gleich Mose vnd Samuel fur mir stünden / so hab ich doch kein Hertz zu diesem Volck / Treibe sie weg von mir / vnd las sie hin faren.
sf_luther_1545_letzte_hand_rev2@Jeremiah:15:2 @ Vnd wenn sie zu dir sagen / Wo sollen wir hin? So sprich zu jnen / so spricht der HERR / Wen der Tod trifft / den treffe er / Wen das Schwert trifft / den treffs / Wen der Hunger trifft / den treff er / Wen das Gefengnis trifft / den treffe es.
sf_luther_1545_letzte_hand_rev2@Jeremiah:15:3 @ Denn ich wil sie heimsuchen mit vierley Plagen(note:)Jm Ebreischen nennet er diese vier Plagen / vier Familias oder Geschlechte. Vielleicht anzuzeigen / Das ein Teuffel vnter sich hat / vnd eine Plage mancherley art vnd weise hat zu verderben / Wie die Ertzte teglich wol erfaren. (:note) / spricht der HERR / mit dem Schwert / das sie erwürget werden / mit Hunden / die sie schleiffen sollen / mit den vogeln des Himels / vnd mit Thieren auff Erden / das sie gefressen vnd verweset werden sollen.
sf_luther_1545_letzte_hand_rev2@Jeremiah:15:4 @ Vnd ich wil sie in allen Königreichen auff Erden / hin vnd her treiben lassen / vmb Manasse willen / des sons Jehiskia des Königes Juda / Des halben / das er zu Jerusalem begangen hat. 4. Reg. 21; 2. Par. 33.
sf_luther_1545_letzte_hand_rev2@Jeremiah:15:5 @ WEr wil denn sich dein erbarmen Jerusalem? Wer wird denn mitleiden mit dir haben? Wer wird denn hingehen / vnd dir Frieden erwerben?
sf_luther_1545_letzte_hand_rev2@Jeremiah:15:6 @ Du hast mich verlassen / spricht der HERR / vnd bist mir abgefallen / Darumb hab ich meine Hand ausgestreckt wider dich / das ich dich verderben wil / Jch bin des erbarmens müde.
sf_luther_1545_letzte_hand_rev2@Jeremiah:15:7 @ Jch wil sie mit der Worffschauffel zum Land hinaus worffeln / vnd wil mein Volck / so von seinem wesen sich nicht bekeren wil / zu eitel Waisen machen vnd vmbbringen.
sf_luther_1545_letzte_hand_rev2@Jeremiah:15:8 @ Es sollen mir mehr Widwen vnter jnen werden / denn des sands am Meer ist / Jch wil vber die Mutter der jungen Manschafft komen lassen / einen offenberlichen Verderber / vnd die Stad damit plötzlich vnd vnuersehens vberfallen lassen /
sf_luther_1545_letzte_hand_rev2@Jeremiah:15:9 @ Das die / so sieben Kinder hat / sol elend sein / vnd von hertzen seufftzen. Denn jre Sonne sol bey hohem tage vntergehen / das beide jr rhum vnd freude ein ende haben sol / Vnd die vbrigen wil ich ins Schwert geben fur jren Feinden / spricht der der HERR.
sf_luther_1545_letzte_hand_rev2@Jeremiah:15:10 @ AH meine Mutter / das du mich geboren hast / wider den jederman haddert vnd zanckt im gantzen Lande / Hab ich doch weder auff Wucher gelihen noch genomen / Noch flucht mir jederman.
sf_luther_1545_letzte_hand_rev2@Jeremiah:15:11 @ Der HERR sprach / Wolan / Jch wil ewer etliche vberig behalten / den es sol wider wol gehen / vnd wil euch zu hülff komen in der not vnd angst / vnter den Feinden.
sf_luther_1545_letzte_hand_rev2@Jeremiah:15:12 @ Meinstu nicht das etwa ein Eisen(note:)Ein böser vber den andern. Die Perser vber die Chaldeer. (:note)sey / welchs künde das eisen vnd ertz von Mitternacht zuschlahen?
sf_luther_1545_letzte_hand_rev2@Jeremiah:15:13 @ Jch wil aber zuuor ewer gut vnd schetze in die Rappuse geben / das jr nichts dafur kriegen sollet / Vnd das vmb aller ewer sunde willen / die jr in allen ewren Grentzen begangen habt.
sf_luther_1545_letzte_hand_rev2@Jeremiah:15:14 @ Vnd wil euch zu ewern Feinden bringen / in ein Land das jr nicht kennet / Denn es ist das fewr in meinem zorn vber euch angangen.
sf_luther_1545_letzte_hand_rev2@Jeremiah:15:15 @ Ah HERR / du weist es / gedencke an vns / vnd nim dich vnser an / vnd reche vns an vnsern Verfolgern. Nim vns auff vnd verzeuch nicht deinen zorn vber sie / Denn du weissest / das wir vmb deinen willen geschmecht werden.
sf_luther_1545_letzte_hand_rev2@Jeremiah:15:16 @ Jn des enthalt vns dein Wort / wenn wirs kriegen vnd dasselb dein wort ist vnsers hertzen freud vnd trost / Denn wir sind ja nach deinem Namen genennet / HERR Gott Zebaoth.
sf_luther_1545_letzte_hand_rev2@Jeremiah:15:17 @ Wir gesellen vns nicht zu den Spöttern / noch frewen vns mit jnen / Sondern bleiben alleine fur deiner hand denn du zürnest seer mit vns.
sf_luther_1545_letzte_hand_rev2@Jeremiah:15:18 @ Warumb weret doch vnser Schmertzen so lange / vnd vnser Wunden sind so gar böse / das sie niemand heilen kan? Du bist vns worden wie ein Born / der nicht mehr quellen wil.
sf_luther_1545_letzte_hand_rev2@Jeremiah:15:19 @ DARumb spricht der HERR also / Wo du dich zu mir heltest / So wil Jch mich zu dir halten / vnd solt mein Prediger bleiben / Vnd wo du die Fromen lerest(note:)Ebra. Kanstu das köstliche vom schnöden scheiden / soltu wie mein Mund sein. (:note) / sich sondern von den bösen Leuten / So soltu mein Lerer sein / Vnd ehe du soltest zu jnen fallen / So müssen sie ehe zu dir fallen.
sf_luther_1545_letzte_hand_rev2@Jeremiah:15:20 @ Denn ich habe dich wider dis Volck / zur festen ehern Mauren gemacht / Ob sie wider dich streiten / Sollen sie dir doch nichts anhaben / Denn Jch bin bey dir / das ich dir helffe vnd dich errette / spricht der HERR.
sf_luther_1545_letzte_hand_rev2@Jeremiah:15:21 @ Vnd wil dich auch erretten aus der hand der Bösen / vnd erlösen aus der hand der Tyrannen. Jere. 1.
sf_luther_1545_letzte_hand_rev2@Jeremiah:16:1 @ VND des HERRN wort geschach zu mir / vnd sprach /
sf_luther_1545_letzte_hand_rev2@Jeremiah:16:2 @ Du solt kein Weib nemen / vnd weder Söne noch töchter zeugen / an diesem ort.
sf_luther_1545_letzte_hand_rev2@Jeremiah:16:3 @ Denn so spricht der HERR von den Sönen vnd Töchtern / so an diesem ort geborn werden / da zu von jren Müttern / die sie geberen / vnd von jren Vetern die sie zeugen / in diesem Lande.
sf_luther_1545_letzte_hand_rev2@Jeremiah:16:4 @ Sie sollen an Kranckheiten sterben / vnd weder beklagt noch begraben werden / sondern sollen Mist werden auff dem lande / Dazu durch Schwert vnd Hunger vmbkomen / vnd jre Leichnam sollen der vogel des Himels vnd der Thier auff erden speise sein.
sf_luther_1545_letzte_hand_rev2@Jeremiah:16:5 @ DEnn so spricht der HERR / Du solt nicht zum Trawrenhaus gehen / vnd solt auch nirgend hinzu klagen gehen / noch mitleiden vber sie haben / Denn ich habe meinen Friede von diesem Volck weggenomen / spricht der HERR / sampt meiner gnade vnd barmhertzigkeit /
sf_luther_1545_letzte_hand_rev2@Jeremiah:16:6 @ Das beide gros vnd klein sollen in diesem Lande sterben / vnd nicht begraben noch geklagt werden / vnd niemand wird sich vber sie zuritzen noch kal machen.
sf_luther_1545_letzte_hand_rev2@Jeremiah:16:7 @ Vnd man wird auch nicht vnter sie austeilen(note:)Brot / speise / oder der gleichen.(:note)vber der Klage / sie zu trösten vber der Leiche / vnd jnen auch nicht aus dem Trostbecher zu trincken geben vber Vater vnd Mutter.
sf_luther_1545_letzte_hand_rev2@Jeremiah:16:8 @ Darumb soltu in kein Trinckhaus gehen / bey jnen zu sitzen / weder zu essen noch zu trincken /
sf_luther_1545_letzte_hand_rev2@Jeremiah:16:9 @ Denn so spricht der HERR Zebaoth / der Gott Jsrael / Sihe / Jch wil an diesem Ort auffheben / fur ewrn augen vnd bey ewrem leben / die stim der freuden vnd wonne / die stim des Breutgams vnd der Braut. Jere. 7.
sf_luther_1545_letzte_hand_rev2@Jeremiah:16:10 @ VND wenn du solchs alles diesem Volck gesagt hast / vnd sie zu dir sprechen werden / Warumb redet der HERR vber vns alle dis grosse vnglück / Welchs ist die Missethat vnd Sünde / damit wir wider den HERRN vnsern Gott gesündiget haben?
sf_luther_1545_letzte_hand_rev2@Jeremiah:16:11 @ Soltu jnen sagen / Darumb / das ewr Veter mich verlassen (spricht der HERR) vnd andern Göttern gefolget / den selbigen gedienet vnd sie angebetet / Mich aber verlassen / vnd mein Gesetz nicht gehalten haben.
sf_luther_1545_letzte_hand_rev2@Jeremiah:16:12 @ Vnd jr noch erger thut denn ewre Veter / Denn sihe / Ein jglicher lebt nach seines bösen hertzen geduncken / das er mir nicht gehorche.
sf_luther_1545_letzte_hand_rev2@Jeremiah:16:13 @ Darumb wil ich euch aus diesem Lande stossen / in ein Land / dauon weder jr noch ewr Veter wissen / Daselbs solt jr andern Göttern dienen tag vnd nacht / Daselbs wil ich euch kein gnade erzeigen. Jere. 5.
sf_luther_1545_letzte_hand_rev2@Jeremiah:16:14 @ DARumb sihe / Es kompt die zeit spricht der HERR / Das man nicht mehr sagen wird / so war der HERR lebt / der die kinder Jsrael aus Egyptenland gefüret hat /
sf_luther_1545_letzte_hand_rev2@Jeremiah:16:15 @ Sondern / so war der HERR lebt / der die kinder Jsrael gefüret hat aus dem Lande der Mitternacht / vnd aus allen Lendern / dahin er sie verstossen hatte / Denn ich wil sie wider bringen in das Land / das ich jren Vetern gegeben habe. Jere. 23.
sf_luther_1545_letzte_hand_rev2@Jeremiah:16:16 @ SJhe / Jch wil viel Fischer aussenden / spricht der HERR / die sollen sie fischen. Vnd darnach wil ich viel Jeger aussenden / die sollen sie fahen / auff allen Bergen / vnd auff allen Hügeln / vnd in allen Steinritzen.
sf_luther_1545_letzte_hand_rev2@Jeremiah:16:17 @ Denn meine Augen sehen auff alle jre wege / das sie fur mich sich nicht verhelen können / vnd jre missethat ist fur meinen Augen vnuerborgen.
sf_luther_1545_letzte_hand_rev2@Jeremiah:16:18 @ Aber zuuor wil ich jre missethat vnd sunde / zwifach bezalen / darumb das sie mein Land mit den Leichen(note:)Das sie viel Kinder opfferten / vnd dem Moloch verbranten. (:note)jrer Abgötterey verunreinigt / vnd mein Erbe mit jren Greweln volgemacht haben.
sf_luther_1545_letzte_hand_rev2@Jeremiah:16:19 @ HERR / du bist meine stercke vnd krafft / vnd meine zuflucht in der not / Die Heiden werden zu dir komen von der Welt ende / vnd sagen / Vnser Veter haben falsche vnd nichtige Götter gehabt / die nichts nützen können.
sf_luther_1545_letzte_hand_rev2@Jeremiah:16:20 @ Wie kan ein mensch Götter machen / die nicht Götter sind?
sf_luther_1545_letzte_hand_rev2@Jeremiah:16:21 @ Darumb sihe / Nu wil ich sie leren / vnd meine Hand vnd gewalt jnen kund thun / Das sie erfaren sollen / Jch heisse der HERR.
sf_luther_1545_letzte_hand_rev2@Jeremiah:17:1 @ DJe sunde(note:)Das ist / Jr Abgötterey treiben sie hart / vnd stifften sie fest / das sie sol bleiben bey den Nachkomen / Gleich wie bey vns die Messe. (:note)Juda ist geschrieben mit eisern Griffeln / vnd mit spitzigen Demanten geschrieben / vnd auff die Tafel jres Hertzen gegraben / vnd auff die hörner an jren Altaren /
sf_luther_1545_letzte_hand_rev2@Jeremiah:17:2 @ Das jre Kinder gedencken sollen / der selben Altar vnd Hainen / bey den grünen Beumen / auff den hohen Bergen.
sf_luther_1545_letzte_hand_rev2@Jeremiah:17:3 @ Aber ich wil deine Höhen / beide auff bergen vnd feldern / sampt deiner Habe vnd alle deinen Schetzen / in die Rappuse geben / Vmb der sunde willen / in allen deinen Grentzen begangen.
sf_luther_1545_letzte_hand_rev2@Jeremiah:17:4 @ Vnd du solt aus deinem Erbe verstossen werden das ich dir gegeben habe / Vnd wil dich zu Knechten deiner Feinde machen / in einem Lande / das du nicht kennest / Denn jr habt ein Fewr meines zorns angezündet / das ewiglich brennen wird.
sf_luther_1545_letzte_hand_rev2@Jeremiah:17:5 @ SO spricht der HERR / Verflucht ist der Man / der sich auff Menschen verlesst / vnd helt Fleisch fur seinen arm / vnd mit seinem hertzen vom HERRN weicht.
sf_luther_1545_letzte_hand_rev2@Jeremiah:17:6 @ Der wird sein / wie die Heide in der Wüsten / vnd wird nicht sehen den zukünfftigen Trost / Sondern wird bleiben in der dürre(note:)Das ist / Er wird vnselig bleiben. (:note) / in der wüsten / in einem vnfruchtbarn Lande da niemand wonet.
sf_luther_1545_letzte_hand_rev2@Jeremiah:17:7 @ Gesegenet aber ist der Man / der sich auff den HERRN verlesst / vnd der HERR seine zuuersicht ist.
sf_luther_1545_letzte_hand_rev2@Jeremiah:17:8 @ Der ist wie ein Baum am Wasser gepflantzt / vnd am Bach gewurtzelt / Denn ob gleich eine hitze kompt / fürcht er sich doch nicht / sondern seine Bletter bleiben grüne / vnd sorget nicht / wenn ein dürre jar kompt / sondern er bringt on auff hören Früchte.
sf_luther_1545_letzte_hand_rev2@Jeremiah:17:9 @ ES ist das Hertz(note:)Wens vbel gehet so ists eitel verzagen. Wens wolgehet / so kans niemand zwingen noch halten in seinem mutwillen / höret kein straffen etc. Weis sich aus zu drehen vnd zu schmücken / auch wider Gottes wort / Aber doch hilffts nicht. Auff deudsch sagten wir / Es ist ein verzweiuelt bös ding vmb ein Hertz / Es kan weder gutes noch böses ertragen. (:note)trotzig vnd verzagt ding / Wer kan es ergründen?
sf_luther_1545_letzte_hand_rev2@Jeremiah:17:10 @ Jch der HERR kan das Hertz ergründen / vnd die Nieren prüfen / vnd gebe einem jglichen nach seinem Thun / nach den früchten seiner werck.
sf_luther_1545_letzte_hand_rev2@Jeremiah:17:11 @ Denn gleich wie ein Vogel der sich vber eier setzt / vnd brütet sie nicht aus / Also ist der so vnrecht Gut samlet / Denn er mus dauon / wenn ers am wenigsten acht / vnd mus doch zu letzt spot dazu haben.
sf_luther_1545_letzte_hand_rev2@Jeremiah:17:12 @ ABer die stet vnsers Heiligthums / nemlich / der Thron göttlicher ehre / ist alle zeit fest blieben.
sf_luther_1545_letzte_hand_rev2@Jeremiah:17:13 @ Denn HERR du bist die hoffnung Jsrael / Alle die dich verlassen / müssen zu schanden werden / vnd die Abtrünnigen müssen in die erden geschrieben werden / Denn sie verlassen den HERRN / die quelle des lebendigen wassers.
sf_luther_1545_letzte_hand_rev2@Jeremiah:17:14 @ Heile du mich HERR / so werde ich heil / Hilff du mir / so ist mir geholffen / Denn du bist mein Rhum. Jere. 2.
sf_luther_1545_letzte_hand_rev2@Jeremiah:17:15 @ SJhe / sie sprechen zu mir / Wo ist denn des HERRN wort? Lieber las her gehen.
sf_luther_1545_letzte_hand_rev2@Jeremiah:17:16 @ Aber ich bin drumb nicht von dir geflohen / mein Hirte / So hab ich Menschen tag(note:)Das ist / rhum bey den Menschen / die doch elend vnd nichts sind in jrem rhum / leben vnd tagen. (:note)nicht begert / das weistu / Was ich gepredigt habe / das ist recht fur dir.
sf_luther_1545_letzte_hand_rev2@Jeremiah:17:17 @ Sey du mir nur nicht schrecklich / meine Zuuersicht in der not.
sf_luther_1545_letzte_hand_rev2@Jeremiah:17:18 @ Las sie zu schanden werden / die mich verfolgen / vnd mich nicht / Las sie erschrecken / vnd mich nicht / Las den tag des vnglücks vber sie gehen / vnd zeschlahe sie zwifach. 1. Cor. 4.
sf_luther_1545_letzte_hand_rev2@Jeremiah:17:19 @ SO spricht der HERR zu mir / Gehe hin vnd trit vnter das thor des Volcks / dadurch die könige Juda aus vnd eingehen / vnd vnter alle thor zu Jerusalem /
sf_luther_1545_letzte_hand_rev2@Jeremiah:17:20 @ vnd sprich zu jnen / Höret des HERRN wort / jr könige Juda / vnd gantz Juda / vnd alle Einwoner zu Jerusalem / so zu diesem thor eingehen /
sf_luther_1545_letzte_hand_rev2@Jeremiah:17:21 @ so spricht der HERR / Hütet euch / vnd traget keine Last am Sabbaths tage / durch die thor / hinein zu Jerusalem /
sf_luther_1545_letzte_hand_rev2@Jeremiah:17:22 @ vnd füret keine Last am Sabbaths tage / aus ewren Heusern / vnd thut keine erbeit / Sondern heiliget den Sabbath tag / wie ich ewern Vetern geboten habe.
sf_luther_1545_letzte_hand_rev2@Jeremiah:17:23 @ Aber sie hören nicht / vnd neigen jre ohren nicht / Sondern bleiben halstarrig / das sie mich ja nicht hören / noch sich zihen lassen.
sf_luther_1545_letzte_hand_rev2@Jeremiah:17:24 @ SO jr mich hören werdet / spricht der HERR / das jr keine last tragt des Sabbaths tage / durch dieser Stad thor ein / sondern denselbigen heiliget / das jr keine erbeit am selbigen tage thut /
sf_luther_1545_letzte_hand_rev2@Jeremiah:17:25 @ So sollen auch durch dieser Stad thor / aus vnd eingehen / Könige vnd Fürsten (die auff dem stuel Dauid sitzen) vnd reiten vnd faren / beide auff wagen vnd rossen / sie vnd jre Fürsten / sampt allen die in Juda vnd zu Jerusalem wonen / vnd sol diese Stad ewiglich bewonet werden.
sf_luther_1545_letzte_hand_rev2@Jeremiah:17:26 @ Vnd sollen komen aus den stedten Juda vnd die vmb Jerusalem her ligen / vnd aus dem lande BenJamin / aus den Gründen vnd von den Gebirgen / vnd vom mittage / die da bringen / Brandopffer / Opffer / Speisopffer vnd Weyrauch / zum Hause des HERRN.
sf_luther_1545_letzte_hand_rev2@Jeremiah:17:27 @ Werdet jr mich aber nicht hören / das jr den Sabbath tag heiliget / vnd keine last traget durch die thor zu Jerusalem ein am Sabbath tage / So wil ich ein Fewer vnter jren Thoren anstecken / das die Heuser zu Jerusalem verzeren / vnd nicht gelescht werden sol.
sf_luther_1545_letzte_hand_rev2@Jeremiah:18:1 @ DJs ist das wort das geschach vom HERRN zu Jeremia / vnd sprach /
sf_luther_1545_letzte_hand_rev2@Jeremiah:18:2 @ Mach dich auff / vnd gehe hinab in des Töpffers haus / daselbs wil ich dich meine wort hören lassen.
sf_luther_1545_letzte_hand_rev2@Jeremiah:18:3 @ Vnd ich gieng hin ab in des Töpffers haus / vnd sihe / er erbeitet eben auff der Scheiben.
sf_luther_1545_letzte_hand_rev2@Jeremiah:18:4 @ Vnd der Topff so er aus dem thon machet / misriet jm vnter henden / Da machet er widerumb ein andern Topff / wie es jm gefiel.
sf_luther_1545_letzte_hand_rev2@Jeremiah:18:5 @ Da geschach des HERRN wort zu mir / vnd sprach /
sf_luther_1545_letzte_hand_rev2@Jeremiah:18:6 @ Kan ich nicht auch also mit euch vmbgehen / jr vom hause Jsrael / wie dieser Töpffer / spricht der HERR? Sihe / wie der Thon ist in des Töpffers hand / Also seid auch jr vom hause Jsrael in meiner hand. Romans. 9.
sf_luther_1545_letzte_hand_rev2@Jeremiah:18:7 @ PLötzlich rede ich wider ein Volck vnd Königreich / Das ichs ausrotten / zerbrechen vnd verderben wolle.
sf_luther_1545_letzte_hand_rev2@Jeremiah:18:8 @ Wo sichs aber bekeret von seiner bosheit / dawider ich rede / so sol mich auch rewen das vnglück / das ich jm gedacht zuthun.
sf_luther_1545_letzte_hand_rev2@Jeremiah:18:9 @ Vnd plötzlich rede ich von einem Volck vnd Königreich / das ichs bawen vnd pflantzen wolle.
sf_luther_1545_letzte_hand_rev2@Jeremiah:18:10 @ So es aber böses thut fur meinen augen / das es meiner stim nicht gehorcht / So sol mich auch rewen das Gut / das ich jm verheissen hatte zuthun.
sf_luther_1545_letzte_hand_rev2@Jeremiah:18:11 @ SO sprich nu zu denen in Juda vnd zu den Bürgern zu Jerusalem / So spricht der HERR / Sihe / Jch bereite euch ein vnglück zu / vnd habe gedancken wider euch / Darumb kere sich ein jglicher von seinem bösen wesen / vnd bessert ewr wesen vnd thun.
sf_luther_1545_letzte_hand_rev2@Jeremiah:18:12 @ Aber sie sprechen / Da wird nicht aus(note:)Vel / das lassen wir.(:note) / Wir wollen nach vnsern gedancken wandeln / vnd ein jglicher thun nach gedancken seines bösen hertzen.
sf_luther_1545_letzte_hand_rev2@Jeremiah:18:13 @ DARumb spricht der HERR / Fragt doch vnter den Heiden / Wer hat je des gleichen gehört? Das die Jungfraw Jsrael / so gar grewlich ding thut?
sf_luther_1545_letzte_hand_rev2@Jeremiah:18:14 @ Bleibt doch der Schnee lenger / auff den Steinen im felde / wens vom Libano herab schneiet / vnd das Regenwasser verscheusst nicht so balde / als mein volck mein vergisset.
sf_luther_1545_letzte_hand_rev2@Jeremiah:18:15 @ Sie reuchern den Göttern / vnd richten Ergernis an auff jren wegen fur vnd fur / vnd gehen auff vngebeneten(note:)Das ist / Sie dienen frembden Göttern / welchs jren Vetern vnbekand / vnd ein vngewonet ding gewest ist / wie ein vngebeneter weg. (:note)strassen /
sf_luther_1545_letzte_hand_rev2@Jeremiah:18:16 @ Auff das jr Land zur wüsten werde / jnen zur ewigen schanden / Das / wer fur vbergehet / sich verwundere / vnd den Kopff schuttele.
sf_luther_1545_letzte_hand_rev2@Jeremiah:18:17 @ Denn ich wil sie durch einen Ostwind zerstrewen fur jren Feinden / Jch wil jnen den rücken vnd nicht das andlitz zeigen / wenn sie verderben.
sf_luther_1545_letzte_hand_rev2@Jeremiah:18:18 @ ABer sie sprechen / Kompt / vnd lasst vns wider Jeremia ratschlagen / Denn die Priester können nicht jrren im Gesetze / vnd die Weisen können nicht feilen(note:)Das heisst / Sie sind von Gott im Ampt. Wie die vnsern sagen / Die Kirche / die Kirche / kan nicht jrren. (:note)mit raten / vnd die Propheten können nicht vnrechtleren / Kompt her / Lasst vns jn mit der Zungen todschlagen / vnd nichts geben auff alle seine Rede.
sf_luther_1545_letzte_hand_rev2@Jeremiah:18:19 @ HERR / hab acht auff mich / vnd höre die stim meiner Widdersacher.
sf_luther_1545_letzte_hand_rev2@Jeremiah:18:20 @ Jsts recht / das man guts mit bösem vergilt? Denn sie haben meiner Seelen eine Gruben gegraben. Gedencke doch / wie ich vor dir gestanden bin / das ich jr bestes redet / vnd deinen grim von jnen wendet.
sf_luther_1545_letzte_hand_rev2@Jeremiah:18:21 @ So straff nu jre Kinder mit Hunger / vnd las sie ins Schwert fallen / das jre weiber vnd Widwen on Kinder sein / vnd jre Menner zu tod geschlagen / vnd jre junge Manschafft im streit durchs schwert erwurget werden /
sf_luther_1545_letzte_hand_rev2@Jeremiah:18:22 @ Das ein geschrey aus jren Heusern gehöret werde / wie du plötzlich habest Kriegsvolck vber sie komen lassen. Denn sie haben eine Gruben gegraben mich zufahen / vnd meinen füssen strick gelegt.
sf_luther_1545_letzte_hand_rev2@Jeremiah:18:23 @ Vnd weil du HERR weissest alle jre anschlege wider mich / das sie mich tödten wollen / So vergib jnen jre missethat nicht(note:)Las dir nicht gefallen jr thun / vnd hilff jnen nicht. (:note) / vnd las jre sünde fur dir nicht ausgetilget werden / Las sie fur dir gestürtzt werden / vnd handel mit jnen nach deinem zorn.
sf_luther_1545_letzte_hand_rev2@Jeremiah:19:1 @ SO spricht der HERR / Gehe hin / vnd keuff dir einen erdenen Krug vom Töpffer / sampt etlichen von den eltesten des Volcks / vnd fur den eltesten der Priester /
sf_luther_1545_letzte_hand_rev2@Jeremiah:19:2 @ Vnd gehe hin aus ins tal BenHinnom / das vor dem Zigelthor ligt / vnd predige daselbs die wort / die ich dir sage /