vul - Job:26-31

vul@Job:26:1 @ respondens autem Iob dixit

vul@Job:26:2 @ cuius adiutor es numquid inbecilli et sustentas brachium eius qui non est fortis

vul@Job:26:3 @ cui dedisti consilium forsitan illi qui non habet sapientiam et prudentiam tuam ostendisti plurimam

vul@Job:26:4 @ quem docere voluisti nonne eum qui fecit spiramen tuum

vul@Job:26:5 @ ecce gigantes gemunt sub aquis et qui habitant cum eis

vul@Job:26:6 @ nudus est inferus coram illo et nullum est operimentum perditioni

vul@Job:26:7 @ qui extendit aquilonem super vacuum et adpendit terram super nihili

vul@Job:26:8 @ qui ligat aquas in nubibus suis ut non erumpant pariter deorsum

vul@Job:26:9 @ qui tenet vultum solii sui et expandit super illud nebulam suam

vul@Job:26:10 @ terminum circumdedit aquis usque dum finiantur lux et tenebrae

vul@Job:26:11 @ columnae caeli contremescunt et pavent ad nutum eius

vul@Job:26:12 @ in fortitudine illius repente maria congregata sunt et prudentia eius percussit superbum

vul@Job:26:13 @ spiritus eius ornavit caelos et obsetricante manu eius eductus est coluber tortuosus

vul@Job:26:14 @ ecce haec ex parte dicta sunt viarum eius et cum vix parvam stillam sermonis eius audierimus quis poterit tonitruum magnitudinis illius intueri

vul@Job:27:1 @ addidit quoque Iob adsumens parabolam suam et dixit

vul@Job:27:2 @ vivit Deus qui abstulit iudicium meum et Omnipotens qui ad amaritudinem adduxit animam meam

vul@Job:27:3 @ quia donec superest halitus in me et spiritus Dei in naribus meis

vul@Job:27:4 @ non loquentur labia mea iniquitatem nec lingua mea meditabitur mendacium

vul@Job:27:5 @ absit a me ut iustos vos esse iudicem donec deficiam non recedam ab innocentia mea

vul@Job:27:6 @ iustificationem meam quam coepi tenere non deseram nec enim reprehendit me cor meum in omni vita mea

vul@Job:27:7 @ sit ut impius inimicus meus et adversarius meus quasi iniquus

vul@Job:27:8 @ quae enim spes est hypocritae si avare rapiat et non liberet Deus animam eius

vul@Job:27:9 @ numquid clamorem eius Deus audiet cum venerit super illum angustia

vul@Job:27:10 @ aut poterit in Omnipotente delectari et invocare Deum in omni tempore

vul@Job:27:11 @ docebo vos per manum Dei quae Omnipotens habeat nec abscondam

vul@Job:27:12 @ ecce vos omnes nostis et quid sine causa vana loquimini

vul@Job:27:13 @ haec est pars hominis impii apud Deum et hereditas violentorum quam ab Omnipotente suscipient

vul@Job:27:14 @ si multiplicati fuerint filii eius in gladio erunt et nepotes eius non saturabuntur pane

vul@Job:27:15 @ qui reliqui fuerint ex eo sepelientur in interitu et viduae illius non plorabunt

vul@Job:27:16 @ si conportaverit quasi terram argentum et sicut lutum praeparaverit vestimenta

vul@Job:27:17 @ praeparabit quidem sed iustus vestietur illis et argentum innocens dividet

vul@Job:27:18 @ aedificavit sicut tinea domum suam et sicut custos fecit umbraculum

vul@Job:27:19 @ dives cum dormierit nihil secum auferet aperit oculos suos et nihil inveniet

vul@Job:27:20 @ adprehendit eum quasi aqua inopia nocte opprimet eum tempestas

vul@Job:27:21 @ tollet eum ventus urens et auferet et velut turbo rapiet eum de loco suo

vul@Job:27:22 @ et mittet super eum et non parcet de manu eius fugiens fugiet

vul@Job:27:23 @ stringet super eum manus suas et sibilabit super illum intuens locum eius

vul@Job:28:1 @ habet argentum venarum suarum principia et auro locus est in quo conflatur

vul@Job:28:2 @ ferrum de terra tollitur et lapis solutus calore in aes vertitur

vul@Job:28:3 @ tempus posuit tenebris et universorum finem ipse considerat lapidem quoque caliginis et umbram mortis

vul@Job:28:4 @ dividit torrens a populo peregrinante eos quos oblitus est pes egentis hominum et invios

vul@Job:28:5 @ terra de qua oriebatur panis in loco suo igne subversa est

vul@Job:28:6 @ locus sapphyri lapides eius et glebae illius aurum

vul@Job:28:7 @ semitam ignoravit avis nec intuitus est oculus vulturis

vul@Job:28:8 @ non calcaverunt eam filii institorum nec pertransivit per eam leaena

vul@Job:28:9 @ ad silicem extendit manum suam subvertit a radicibus montes

vul@Job:28:10 @ in petris rivos excidit et omne pretiosum vidit oculus eius

vul@Job:28:11 @ profunda quoque fluviorum scrutatus est et abscondita produxit in lucem

vul@Job:28:12 @ sapientia vero ubi invenitur et quis est locus intellegentiae

vul@Job:28:13 @ nescit homo pretium eius nec invenitur in terra suaviter viventium

vul@Job:28:14 @ abyssus dicit non est in me et mare loquitur non est mecum

vul@Job:28:15 @ non dabitur aurum obrizum pro ea nec adpendetur argentum in commutatione eius

vul@Job:28:16 @ non conferetur tinctis Indiae coloribus nec lapidi sardonico pretiosissimo vel sapphyro

vul@Job:28:17 @ non adaequabitur ei aurum vel vitrum nec commutabuntur pro ea vasa auri

vul@Job:28:18 @ excelsa et eminentia non memorabuntur conparatione eius trahitur autem sapientia de occultis

vul@Job:28:19 @ non adaequabitur ei topazium de Aethiopia nec tincturae mundissimae conponetur

vul@Job:28:20 @ unde ergo sapientia veniet et quis est locus intellegentiae

vul@Job:28:21 @ abscondita est ab oculis omnium viventium volucres quoque caeli latet

vul@Job:28:22 @ perditio et mors dixerunt auribus nostris audivimus famam eius

vul@Job:28:23 @ Deus intellegit viam eius et ipse novit locum illius

vul@Job:28:24 @ ipse enim fines mundi intuetur et omnia quae sub caelo sunt respicit

vul@Job:28:25 @ qui fecit ventis pondus et aquas adpendit mensura

vul@Job:28:26 @ quando ponebat pluviis legem et viam procellis sonantibus

vul@Job:28:27 @ tunc vidit illam et enarravit et praeparavit et investigavit

vul@Job:28:28 @ et dixit homini ecce timor Domini ipsa est sapientia et recedere a malo intellegentia

vul@Job:29:1 @ addidit quoque Iob adsumens parabolam suam et dixit

vul@Job:29:2 @ quis mihi tribuat ut sim iuxta menses pristinos secundum dies quibus Deus custodiebat me

vul@Job:29:3 @ quando splendebat lucerna eius super caput meum et ad lumen eius ambulabam in tenebris

vul@Job:29:4 @ sicut fui in diebus adulescentiae meae quando secreto Deus erat in tabernaculo meo

vul@Job:29:5 @ quando erat Omnipotens mecum et in circuitu meo pueri mei

vul@Job:29:6 @ quando lavabam pedes meos butyro et petra fundebat mihi rivos olei

vul@Job:29:7 @ quando procedebam ad portam civitatis et in platea parabant cathedram mihi

vul@Job:29:8 @ videbant me iuvenes et abscondebantur et senes adsurgentes stabant

vul@Job:29:9 @ principes cessabant loqui et digitum superponebant ori suo

vul@Job:29:10 @ vocem suam cohibebant duces et lingua eorum gutturi suo adherebat

vul@Job:29:11 @ auris audiens beatificabat me et oculus videns testimonium reddebat mihi

vul@Job:29:12 @ quod liberassem pauperem vociferantem et pupillum cui non esset adiutor

vul@Job:29:13 @ benedictio perituri super me veniebat et cor viduae consolatus sum

vul@Job:29:14 @ iustitia indutus sum et vestivit me sicut vestimento et diademate iudicio meo

vul@Job:29:15 @ oculus fui caeco et pes claudo

vul@Job:29:16 @ pater eram pauperum et causam quam nesciebam diligentissime investigabam

vul@Job:29:17 @ conterebam molas iniqui et de dentibus illius auferebam praedam

vul@Job:29:18 @ dicebamque in nidulo meo moriar et sicut palma multiplicabo dies

vul@Job:29:19 @ radix mea aperta est secus aquas et ros morabitur in messione mea

vul@Job:29:20 @ gloria mea semper innovabitur et arcus meus in manu mea instaurabitur

vul@Job:29:21 @ qui me audiebant expectabant sententiam et intenti tacebant ad consilium meum

vul@Job:29:22 @ verbis meis addere nihil audebant et super illos stillabat eloquium meum

vul@Job:29:23 @ expectabant me sicut pluviam et os suum aperiebant quasi ad imbrem serotinum

vul@Job:29:24 @ si quando ridebam ad eos non credebant et lux vultus mei non cadebat in terram

vul@Job:29:25 @ si voluissem ire ad eos sedebam primus cumque sederem quasi rex circumstante exercitu eram tamen maerentium consolator

vul@Job:30:1 @ nunc autem derident me iuniores tempore quorum non dignabar patres ponere cum canibus gregis mei

vul@Job:30:2 @ quorum virtus manuum erat mihi pro nihilo et vita ipsa putabantur indigni

vul@Job:30:3 @ egestate et fame steriles qui rodebant in solitudine squalentes calamitate et miseria

vul@Job:30:4 @ et mandebant herbas et arborum cortices et radix iuniperorum erat cibus eorum

vul@Job:30:5 @ qui de convallibus ista rapientes cum singula repperissent ad ea cum clamore currebant

vul@Job:30:6 @ in desertis habitabant torrentium et in cavernis terrae vel super glaream

vul@Job:30:7 @ qui inter huiuscemodi laetabantur et esse sub sentibus delicias conputabant

vul@Job:30:8 @ filii stultorum et ignobilium et in terra penitus non parentes

vul@Job:30:9 @ nunc in eorum canticum versus sum et factus sum eis proverbium

vul@Job:30:10 @ abominantur me et longe fugiunt a me et faciem meam conspuere non verentur

vul@Job:30:11 @ faretram enim suam aperuit et adflixit me et frenum posuit in os meum

vul@Job:30:12 @ ad dexteram orientis calamitatis meae ilico surrexerunt pedes meos subverterunt et oppresserunt quasi fluctibus semitis suis

vul@Job:30:13 @ dissipaverunt itinera mea insidiati sunt mihi et praevaluerunt et non fuit qui ferret auxilium

vul@Job:30:14 @ quasi rupto muro et aperta ianua inruerunt super me et ad meas miserias devoluti sunt

vul@Job:30:15 @ redactus sum in nihili abstulisti quasi ventus desiderium meum et velut nubes pertransiit salus mea

vul@Job:30:16 @ nunc autem in memet ipso marcescit anima mea et possident me dies adflictionis

vul@Job:30:17 @ nocte os meum perforatur doloribus et qui me comedunt non dormiunt

vul@Job:30:18 @ in multitudine eorum consumitur vestimentum meum et quasi capitio tunicae sic cinxerunt me

vul@Job:30:19 @ conparatus sum luto et adsimilatus favillae et cineri

vul@Job:30:20 @ clamo ad te et non exaudis me sto et non respicis me

vul@Job:30:21 @ mutatus es mihi in crudelem et in duritia manus tuae adversaris mihi

vul@Job:30:22 @ elevasti me et quasi super ventum ponens elisisti me valide

vul@Job:30:23 @ scio quia morti tradas me ubi constituta domus est omni viventi

vul@Job:30:24 @ verumtamen non ad consumptionem eorum emittis manum tuam et si corruerint ipse salvabis

vul@Job:30:25 @ flebam quondam super eum qui adflictus erat et conpatiebatur anima mea pauperi

vul@Job:30:26 @ expectabam bona et venerunt mihi mala praestolabar lucem et eruperunt tenebrae

vul@Job:30:27 @ interiora mea efferbuerunt absque ulla requie praevenerunt me dies adflictionis

vul@Job:30:28 @ maerens incedebam sine furore consurgens in turba clamavi

vul@Job:30:29 @ frater fui draconum et socius strutionum

vul@Job:30:30 @ cutis mea denigrata est super me et ossa mea aruerunt prae caumate

vul@Job:30:31 @ versa est in luctum cithara mea et organum meum in vocem flentium

vul@Job:31:1 @ pepigi foedus cum oculis meis ut ne cogitarem quidem de virgine

vul@Job:31:2 @ quam enim partem haberet Deus in me desuper et hereditatem Omnipotens de excelsis

vul@Job:31:3 @ numquid non perditio est iniquo et alienatio operantibus iniustitiam

vul@Job:31:4 @ nonne ipse considerat vias meas et cunctos gressus meos dinumerat

vul@Job:31:5 @ si ambulavi in vanitate et festinavit in dolo pes meus

vul@Job:31:6 @ adpendat me in statera iusta et sciat Deus simplicitatem meam

vul@Job:31:7 @ si declinavit gressus meus de via et si secutum est oculos meos cor meum et in manibus meis adhesit macula

vul@Job:31:8 @ seram et alius comedat et progenies mea eradicetur

vul@Job:31:9 @ si deceptum est cor meum super mulierem et si ad ostium amici mei insidiatus sum

vul@Job:31:10 @ scortum sit alteri uxor mea et super illam incurventur alii

vul@Job:31:11 @ hoc enim nefas est et iniquitas maxima

vul@Job:31:12 @ ignis est usque ad perditionem devorans et omnia eradicans genimina

vul@Job:31:13 @ si contempsi subire iudicium cum servo meo et ancillae meae cum disceptarent adversum me

vul@Job:31:14 @ quid enim faciam cum surrexerit ad iudicandum Deus et cum quaesierit quid respondebo illi

vul@Job:31:15 @ numquid non in utero fecit me qui et illum operatus est et formavit in vulva unus

vul@Job:31:16 @ si negavi quod volebant pauperibus et oculos viduae expectare feci

vul@Job:31:17 @ si comedi buccellam meam solus et non comedit pupillus ex ea

vul@Job:31:18 @ quia ab infantia mea crevit mecum miseratio et de utero matris meae egressa est mecum

vul@Job:31:19 @ si despexi pereuntem eo quod non habuerit indumentum et absque operimento pauperem

vul@Job:31:20 @ si non benedixerunt mihi latera eius et de velleribus ovium mearum calefactus est

vul@Job:31:21 @ si levavi super pupillum manum meam etiam cum viderem me in porta superiorem

vul@Job:31:22 @ umerus meus a iunctura sua cadat et brachium meum cum suis ossibus confringatur

vul@Job:31:23 @ semper enim quasi tumentes super me fluctus timui Deum et pondus eius ferre non potui

vul@Job:31:24 @ si putavi aurum robur meum et obrizae dixi fiducia mea

vul@Job:31:25 @ si laetatus sum super multis divitiis meis et quia plurima repperit manus mea

vul@Job:31:26 @ si vidi solem cum fulgeret et lunam incedentem clare

vul@Job:31:27 @ et lactatum est in abscondito cor meum et osculatus sum manum meam ore meo

vul@Job:31:28 @ quae est iniquitas maxima et negatio contra Deum altissimum

vul@Job:31:29 @ si gavisus sum ad ruinam eius qui me oderat et exultavi quod invenisset eum malum

vul@Job:31:30 @ non enim dedi ad peccandum guttur meum ut expeterem maledicens animam eius

vul@Job:31:31 @ si non dixerunt viri tabernaculi mei quis det de carnibus eius ut saturemur

vul@Job:31:32 @ foris non mansit peregrinus ostium meum viatori patuit

vul@Job:31:33 @ si abscondi quasi homo peccatum meum et celavi in sinu meo iniquitatem meam

vul@Job:31:34 @ si expavi ad multitudinem nimiam et despectio propinquorum terruit me et non magis tacui nec egressus sum ostium

vul@Job:31:35 @ quis mihi tribuat auditorem ut desiderium meum Omnipotens audiat et librum scribat ipse qui iudicat

vul@Job:31:36 @ ut in umero meo portem illum et circumdem illum quasi coronam mihi

vul@Job:31:37 @ per singulos gradus meos pronuntiabo illum et quasi principi offeram eum

vul@Job:31:38 @ si adversum me terra mea clamat et cum ipsa sulci eius deflent

vul@Job:31:39 @ si fructus eius comedi absque pecunia et animam agricolarum eius adflixi

vul@Job:31:40 @ pro frumento oriatur mihi tribulus et pro hordeo spina finita sunt verba Iob

vul@Job:32:1 @ omiserunt autem tres viri isti respondere Iob eo quod iustus sibi videretur