Matthew:27:1-31
vul@Matthew:27:1 @ mane autem facto consilium inierunt omnes principes sacerdotum et seniores populi adversus Iesum ut eum morti traderent
vul@Matthew:27:2 @ et vinctum adduxerunt eum et tradiderunt Pontio Pilato praesidi
vul@Matthew:27:3 @ tunc videns Iudas qui eum tradidit quod damnatus esset paenitentia ductus rettulit triginta argenteos principibus sacerdotum et senioribus
vul@Matthew:27:4 @ dicens peccavi tradens sanguinem iustum at illi dixerunt quid ad nos tu videris
vul@Matthew:27:5 @ et proiectis argenteis in templo recessit et abiens laqueo se suspendit
vul@Matthew:27:6 @ principes autem sacerdotum acceptis argenteis dixerunt non licet mittere eos in corbanan quia pretium sanguinis est
vul@Matthew:27:7 @ consilio autem inito emerunt ex illis agrum figuli in sepulturam peregrinorum
vul@Matthew:27:8 @ propter hoc vocatus est ager ille Acheldemach ager sanguinis usque in hodiernum diem
vul@Matthew:27:9 @ tunc impletum est quod dictum est per Hieremiam prophetam dicentem et acceperunt triginta argenteos pretium adpretiati quem adpretiaverunt a filiis Israhel
vul@Matthew:27:10 @ et dederunt eos in agrum figuli sicut constituit mihi Dominus
vul@Matthew:27:11 @ Iesus autem stetit ante praesidem et interrogavit eum praeses dicens tu es rex Iudaeorum dicit ei Iesus tu dicis
vul@Matthew:27:12 @ et cum accusaretur a principibus sacerdotum et senioribus nihil respondit
vul@Matthew:27:13 @ tunc dicit illi Pilatus non audis quanta adversum te dicant testimonia
vul@Matthew:27:14 @ et non respondit ei ad ullum verbum ita ut miraretur praeses vehementer
vul@Matthew:27:15 @ per diem autem sollemnem consueverat praeses dimittere populo unum vinctum quem voluissent
vul@Matthew:27:16 @ habebat autem tunc vinctum insignem qui dicebatur Barabbas
vul@Matthew:27:17 @ congregatis ergo illis dixit Pilatus quem vultis dimittam vobis Barabban an Iesum qui dicitur Christus
vul@Matthew:27:18 @ sciebat enim quod per invidiam tradidissent eum
vul@Matthew:27:19 @ sedente autem illo pro tribunali misit ad illum uxor eius dicens nihil tibi et iusto illi multa enim passa sum hodie per visum propter eum
vul@Matthew:27:20 @ princeps autem sacerdotum et seniores persuaserunt populis ut peterent Barabban Iesum vero perderent
vul@Matthew:27:21 @ respondens autem praeses ait illis quem vultis vobis de duobus dimitti at illi dixerunt Barabban
vul@Matthew:27:22 @ dicit illis Pilatus quid igitur faciam de Iesu qui dicitur Christus
vul@Matthew:27:23 @ dicunt omnes crucifigatur ait illis praeses quid enim mali fecit at illi magis clamabant dicentes crucifigatur
vul@Matthew:27:24 @ videns autem Pilatus quia nihil proficeret sed magis tumultus fieret accepta aqua lavit manus coram populo dicens innocens ego sum a sanguine iusti huius vos videritis
vul@Matthew:27:25 @ et respondens universus populus dixit sanguis eius super nos et super filios nostros
vul@Matthew:27:26 @ tunc dimisit illis Barabban Iesum autem flagellatum tradidit eis ut crucifigeretur
vul@Matthew:27:27 @ tunc milites praesidis suscipientes Iesum in praetorio congregaverunt ad eum universam cohortem
vul@Matthew:27:28 @ et exuentes eum clamydem coccineam circumdederunt ei
vul@Matthew:27:29 @ et plectentes coronam de spinis posuerunt super caput eius et harundinem in dextera eius et genu flexo ante eum inludebant dicentes have rex Iudaeorum
vul@Matthew:27:30 @ et expuentes in eum acceperunt harundinem et percutiebant caput eius
vul@Matthew:27:31 @ et postquam inluserunt ei exuerunt eum clamydem et induerunt eum vestimentis eius et duxerunt eum ut crucifigerent